«Врач анахь дэгъу» зыфиIорэ республикэ зэнэ­къокъур Адыгеим щаублагъ. Ар хабзэ хъугъэу илъэс къэс зэхащэ. Врач сэнэхьатым уасэу иIэм зыкъе­гъэIэтыгъэным, мы лъэныкъом Iоф щызышIэхэрэм яIэпэIэсэныгъэ хагъэхъоным зэнэкъокъур фэIорышIэ.

Iофтхьабзэм иапэрэ уцугъо медицинэ организациехэм ащэкIо. Илъэси 10-м ехъугъэу Iоф зышIэрэ врачхэр ары мыщ хэлэжьэнхэ зылъэкIыщтхэр. ЯтIонэрэ уцугъом (жъоныгъуакIэм и 25-м нэс) изэхэщэн епхыгъэ тхылъхэм Адыгэ Республикэм псауныгъэр къэухъумэгъэнымкIэ и Министерствэ ыгъэнэфэгъэ комиссиер ахэплъэ. Нэужым зэнэкъокъум хэхьэгъэ врачхэм афэгъэхьыгъэ къэбарыр ыпэкIэ зигугъу къэтшIыгъэ Министерствэм иофициальнэ сайт къырагъэхьащт. ЖъоныгъуакIэм и 26-м къыщегъэжьа­гъэу и 30-м нэс цIыфхэм амакъэ ахэм афатын алъэкIыщт. Ар жъоныгъуакIэм и 30-м сыхьатыр 23-м зэфашIыжьыщт. ЦIыфхэм къыхахыгъэ врачым республикэ комиссием зы мэкъэ тедзэ ритыщт.

Зэнэкъокъум хэлэжьагъэхэр мэфэкI шIыкIэм тетэу Адыгэ Республикэм и Къэралыгъо филармоние щагъэшIощтых. ТекIоныгъэ къэзыхьыгъэм «Анахь врач дэгъу» зыфиIорэ цIэр фагъэшъошэщт, диплом, ахъщэ шIухьафтын ыкIи зэкIэмэ зэлъашIэрэ ювелирэу Еутых Асе ышIыгъэ статуэткэр ратыщтых.