Лъэпкъ проектэу «Псауныгъэм» къыдыхэлъыта­гъэу апэрэ медикэ-санитарнэ IэпыIэгъур цIыфхэм ягъэ­гъотыгъэным фытегъэпсыхьэгъэ Iофтхьабзэу «Псауныгъэм имэшIоку» зыфиIорэр лъагъэкIуатэ, къекIо­кIырэ медицинэ комплексхэм яшIуагъэкIэ нэбгырэ 500-м ехъу мы илъэсым ауплъэкIугъах.

Медицинэ профилактикэмкIэ республикэ Гупчэм иIофышIэхэм волонтер-медикхэр яIэпыIэгъоу дэкIыгъо иIагъ. Теуцожь районым ит къутырэу Петровым ахэр щыIагъэх.

— Адыгеим мыгъэ нэбгырэ 500-м ехъумэ уплъэкIунхэр ащыфэтшIыгъэх. Волонтер-медикхэр тигъусэхэу район гупчэхэм апэIудзыгъэ псэупIипшI къэткIухьагъ, — къыIуагъ медицинэ профилактикэмкIэ Гупчэм ипащэу Джульетта Керим-Заде.

Нэбгырэ пэпчъ терапевтым, психологым гущыIэгъу афэхъун, «КардиовизорымкIэ» заригъэуплъэкIун, ВИЧ-инфекцием епхы­гъэу экспресс-тестирование ыкIун амал иIагъ.

ПстэумкIи нэбгырэ 23-мэ япсауныгъэ изытет ащ щауплъэ­кIугъ. Ахэм ащыщэу нэбгырэ 13-м ялъыдэкIуае шапхъэм нахьыбагъ. Эндокринологым нахь игъэкIотыгъэу зырагъэуплъэкIунэу нэбгыри 3-мэ араIуагъ.

Охътэ благъэхэм ахэр Шэуджэн районым кIощтых.

Абрэдж Сэтэнай.