Ны-тыхэу тызыхэт илъэсым игъэмэфэ уахътэ зисабый лагерым зы­гъа­кIохэрэм путевкэм ищэфын тырагъэкIодагъэм ызыныкъом къы­фы­рагъэгъэзэжьынэу УФ-м и Президентэу Владимир Путиным и Джэ­псалъэ къыщиIогъагъ.

— Унагъохэм зызщагъэпсэфыщт чIыпIэри, ясабый зыдагъэкIощт лагерыри къыхахыгъа­хэх. Ахэм къэралыгъор IэпыIэгъу зэрафэхъущтыр зэхашIэн фае, — къыщиIуагъ Президентым Джэпсалъэм унашъоу къы­щишIыгъэхэр гъэцэкIагъэ зэрэ­хъухэрэм фэгъэхьыгъэ зэхэсыгъоу зэхищэгъагъэм. — Путевкэм ыуасэ къегъэгъэзэжьыгъэным фэгъэхьыгъэ программэр кIэлэцIыкIоу, зихэхъогъоу, ныб­жьыкIэу олимпиадэхэм, зэнэ­къокъу зэфэшъхьафхэм текIоныгъэхэр къащыдэзыхыгъэхэр, волонтерхэм ясатырхэм ахэтхэр шIокI имыIэу анэсын фае.

УФ-м и Премьер-министрэу Михаил Мишустиным къызэ-ри­IуагъэмкIэ, лагерым сабыир зы­гъэкIощтхэм ыкIи къэралы­гъокIоцI зекIоныр къыхэзыхыгъэхэм путевкэу къащэфыгъэм тефэгъэ ахъщэм щыщ Iахьым къегъэгъэзэжьыгъэным пэIуигъэ­хьанэу сомэ миллиарди 4,5-рэ Правительствэм джыри ыгъэ­нэфагъ. Арэу щытми, кIэлэцIыкIу­хэм языгъэпсэфын ылъэ­ныкъо­кIэ Iофыгъохэр къыкъо­кIыгъэх.

Апэрэ зыгъэпсэфыгъо уахътэр (потокыр) лагерьхэм мэкъу­огъум и 1-м ащырагъэжьэщт. Ащ зисабый зыгъакIомэ зышIоигъохэм путевкэхэр пэшIоры­гъэшъэу ащэфыгъахэх. Президентым унашъоу къышIыгъэм ахэр къыхиубытэхэрэп, сыда пIомэ, путевкэ уасэм ызыныкъо къегъэгъэзэжьыгъэным фэгъэ­хьыгъэ программэр жъоныгъуа­кIэм и 25-м атIупщынэу ары УФ-м ивице-премьерэу Дмитрий Чернышенкэм къызэриIуагъэр. Унагъохэм ащыщыбэм путевкэхэр къызэкIагъэкIожьых.

Владимир Путиным ар ыдагъэп, зыщэфыгъахэхэм аты­гъэм ызыныкъом къызэрафы­ра­гъэ­гъэзэжьыщт шIыкIэр охътэ кIэкIым къагъэнэфэнэу къафигъэпытагъ.

— ЦIыфхэм атыгъэм щыщ къафядгъэгъэзэжьынэу гущыIэ яттыгъ. «Гъэмэфэ зы­гъэпсэфыгъо уахътэр» тIуагъэ нахь, «апэрэ сменэм кIохэрэр» е «ятIонэрэм къыхиубытэхэрэр» тIозэ зэтетфы­гъэп. Арышъ, ахъщэу тефэщтыр къэшъулъыти, ищыкIагъэм фэдиз хэжъугъэхъожь, — къафигъэпытагъ къэралыгъом ипащэ.