Урысыем и Президентэу Владимир Путиным Федеральнэ ЗэIу­кIэм зызэрэфигъэзэгъэ Джэпсалъэм икIэуххэм атетэу пшъэрылъ гъэнэфа­гъэхэр зыщафишIыгъэ тхылъхэм акIэтхагъ.

Ахэм зэу ащыщ «Единэ Россием» исоциальнэ гукъэкI зэфэшъхьафхэр.

ЩыIэныгъэм чIыпIэ къин ри­гъэуцогъэ бзылъфыгъэ лъэрымыхьэхэу жьэу учетым хэуцуа­гъэхэм ахъщэу аратырэм бэ­дзэогъум и 1-м къыщегъэ­жьагъэу хагъэхъощт. Ахъщэ анахь макIэу Урысые Федерацием ишъолъыр щагъэуцугъэм ызыныкъо фэдиз ар хъущт.

Президентыр джащ фэдэу кIэлэцIыкIу лагерьхэм зэрэ­кIохэрэ путевкэхэм ауасэ ызыныкъо къафегъэгъэзэжьыгъэным ехьылIэгъэ документми кIэтхагъ. ЫпэкIэ «Единэ Россием» ащ фэдэ предложение къыхьыгъагъ. ЖъоныгъуакIэм и 15-м къыщегъэжьагъэу ащ кIуачIэ иIэ хъугъэ. Къэралыгъом ипащэ пшъэрылъ афишIыгъ 2021-рэ илъэсым ыкIэхэм анэс зекIо кешбэкымкIэ программэр лъагъэкIотэнэу.

Шъолъырхэм арыт гурыт еджапIэхэм апае илъэс къэс автобус мини 4-м ехъу къа­щэфыщт. Федеральнэ бюджетым имылъкукIэ автопаркхэр гъэкIэжьыгъэнхэм пае 2021 — 2024-рэ илъэсхэм автобусыкIэхэу къащэфыщтхэр тихэ­гъэгу къыщыдагъэкIыгъэхэр ары. «Единэ Россием» и Генеральнэ совет исекретарэу Андрей Турчак бэмышIэу Нижегородскэ хэкум зыщэIэм, гурыт еджапIэхэм яавтобусхэр зэблэхъугъэнхэ зэрэфаер къыIогъагъ.

Урысые Федерацием и Правительствэ, шъолъырхэм япащэхэм, «Газпромым» пшъэрылъ афашIыгъ ыпкIэ хэмылъэу газыр цIыфхэм яунэхэм афаращэлIэнэу. АщкIэ «Единэ Россием» графикыр зэрэзэхигъэуцощтым фэгъэхьыгъэу Андрей Турчак къыIогъагъ.

Партием зыныбжь хэкIотагъэхэмрэ сабыибэ зэрыс унагъохэмрэ анахьэу ынаIэ атыригъэтыщт, документхэм ягъэхьазырынкIэ ахэм IэпыIэгъу афэхъущтых.

Урысые Федерацием ишъо­лъырхэм инфраструктурэ чIы­фэхэр ятыгъэнхэм ехьылIэгъэ предложениеми Урысыем и Президент къыдыригъэштагъ. Проценти 3 тегъахъо зиIэ чIы­фэхэр илъэс 15-кIэ аратыщтых. Транспорт, инженер, коммунальнэ, социальнэ, зекIо инфраструктурэхэм ягъэ­псын, ягъэкIэжьын, общественнэ транспортым а мылъкур апэIуагъэхьащт.

Къэралыгъом ипащэ унашъо зэришIыгъэм тетэу илъэси 8-м къыщегъэжьагъэу илъэс 17-м нэс зыныбжь кIэлэцIыкIухэр зиIэ унагъохэу тыр е ныр зэрымысыжьхэм бэдзэогъум и 1-м къыщегъэжьагъэу ахъщэ IэпыIэгъу аратэу аублэщт. Президентым Джэпсалъэр къызешI нэуж «Единэ Россием» хэбзэгъэуцугъэхэм зэхъокIыныгъэхэр афишIыгъэх. Ахъщэ IэпыIэгъур зэратыщтхэр унагъохэу зихахъо ахъщэ анахь макIэу шъолъырым щагъэнэфагъэм нахь цIыкIухэр ары.

Джащ фэдэу «Единэ Россием» бзылъфыгъэ лъэрымы­хьэхэм ахъщэ IэпыIэгъу зэраратырэм, илъэси 7-м зыныбжь нэмысыгъэ кIэлэцIыкIухэр зиIэ ны-тыхэм проценти 100-у больничнэхэр ятыгъэнхэм яхьы­лIэгъэ законми зэхъокIыны­гъэхэр фишIыгъэх.

«Демографиеми, унагъохэм IэпыIэгъу ятыгъэнми, кIэлэцIыкIухэм япсауныгъэ гъэпытэ­гъэнми Президентым и Джэ­псалъэ чIыпIэшхо щаубытыгъ. Адыгеим щыпсэухэрэм соци­альнэ IэпыIэгъу ягъэгъотыгъэнымкIэ амалхэр икъоу зэрахьэх. Сабыйхэр зэрыс, гъот макIэ зиIэ унэгъо 10896-мэ мы аужырэ уахътэм зэтыгъо ахъщэ IэпыIэгъу, кIэлэцIыкIу пчъа­гъэм елъытыгъэу сомэ мини 3, мини 5 аратыгъ, унэгъо 1336-у ящэнэрэ кIэлэцIыкIу е ащ на­хьыбэ зиIэхэм сомэ 50000 зы­рыз аратыгъ. Республикэ бюджетри къыхэлажьэзэ, кIэлэцIыкIухэр зэрыс унагъохэу илъэси 3-м къыщегъэжьагъэу илъэси 7-м нэс зыныбжь сабыйхэр зиIэхэм мазэ къэс ахъщэ араты. Ящэнэрэ, яплIэнэрэ сабыим ыныбжь илъэси 3 охъуфэ гъот макIэ зиIэ унагъом мазэ къэс ахъщэ раты. Апэрэ сабыир къызэрэхъугъэм епхыгъэу гъот макIэ зиIэ унэгъо мини 3,5-мэ ахъщэ аIокIэ. Унагъохэм IэпыIэгъу къазэрара­тырэр къэралыгъо социальнэ политикэм изы лъэныкъо шъхьа­Iэу, ащ фэдэ мылъкур унагъохэм лъэшэу къашъхьапэу сэ­лъытэ», — къыIуагъ Урысые общественнэ организациеу «Еди­нэ Россием и НыбжьыкIэ гвардие» и Адыгэ шъолъыр къутамэ ипащэу, Мыекъуапэ идепутатэу Бэрзэдж Асыет.

Шъугу къэтэгъэкIыжьы Урысыем и Президент Федеральнэ ЗэIукIэм зызэрэфигъэзэгъэ Джэпсалъэм «Единэ Россием» исоциальнэ предложение заулэмэ къазэращыдыригъэштагъэр. Ахэм ахэхьэх зисабыйхэр кIэлэцIыкIу IыгъыпIэм кIорэ ны-тыхэм проценти 100-у больничнэхэр къафэлъытэгъэнхэр, щыIэныгъэм чIыпIэ къин ри­гъэуцогъэ бзылъфыгъэ лъэ­рымыхьэхэм ахъщэ IэпыIэгъу яты­гъэныр, пкIэ лъамытэу цIыф­хэм яунэхэм газыр ящэлIэгъэныр, инфраструктурэ проекты­шхохэм ягъэцэкIэн пае шъо­лъырхэм фэгъэкIотэныгъэ зиIэ бюджет чIыфэхэр ятыгъэнхэр, IэпыIэгъу псынкIэ языгъэгъотырэ къулыкъухэм яавтомобиль парк гъэкIэжьыгъэныр, мобильнэ поликлиникэхэр нахьыбэ шIыгъэнхэр, гурыт еджапIэхэм автобусхэр къафэщэфыгъэнхэр.