Шъолъыр гъэIорышIэнымкIэ Гупчэм иIофышIэхэм цIыфхэм бэрэ закъыфагъазэ врачхэр упчIэжьэгъу ашIынхэ ыкIи япсауныгъэ ауплъэкIун зэрэфаем фэгъэхьыгъэу.

Лъэныкъо зэфэшъхьафхэмкIэ Iазэхэрэм адэжь игъом зыхя­гъэтхэгъэным епхыгъэ гумэкIыгъор анахь шъхьэIитфэу респуб­ликэм щыпсэухэрэр къызэряуа­лIэхэрэм ащыщ.

А гумэкIыгъор дагъэзыжьынымкIэ ишIуагъэ къэкIуагъ псауныгъэр къэухъумэгъэнымкIэ Министерствэм иIэшъхьэтетхэмрэ Гупчэм мы лъэныкъом­кIэ щылэжьэрэ IофышIэмрэ язэпхыныгъэ. ЗэдэгущыIэгъоу зэдашIыгъэм ыуж унашъо ашIыгъ пчъэ зэIухыгъэхэм я Мафэ зэхащэнэу. Iофтхьабзэр Адыгэ рес­публикэ клиническэ сымэ­джэщым мэлылъфэгъу мазэм ыкIэм щыкIуагъ Мыекъо­пэ IэзапIэм иврачхэр къыхагъэ­лажьэхи. Мыхэм ащыщэу 17-р сымэджэ нэбгыри 153-мэ уп­чIэ­жьэгъу афэхъугъэх, УЗИ нэбгыри 185-мэ афашIыгъ, биохимическэ анализхэу яIэзэнхэм пае ящыкIагъэхэри аIахыгъэх.

ЗэкIэми апэу Iофтхьабзэм къыхагъэлэжьагъэхэр хэужъыныхьэгъэ уз зиIэхэр, гу-лъынтфэ узхэм агъэгумэкIыхэрэр, коронавирусым ыгъэсымэджагъэхэр ыкIи шъоущыгъу уз зиIэхэр арых. Мыхэр арых зэкIэми анахьыбэу IэпыIэгъу щыкIэхэу къэралыгъо къулы­къухэм закъыфэзгъэзагъэхэр. Iофтхьабзэр зэрэщыIэщтым фэгъэхьыгъэ мэкъэгъэIур пэшIорыгъэшъэу IэзапIэм идэпкъхэм къапалъэгъагъ.

Медицинэ IэпыIэгъу ягъэгъо­тыгъэным пае мы IофшIэкIэ амалым ишIуагъэ къызэрэкIуагъэм фэшI фэдэ Iофтхьабзэхэр зэхащэ зэпытынхэу рахъухьагъ ыкIи жъоныгъуакIэм иапэрэ тхьамафэ кIэлэцIыкIухэм апайи рагъэкIокIыгъ. Узхэм ягъэунэфынкIэ кIэлэцIыкIу гупчэм ар щызэшIуахыгъ. Лъэныкъо зэфэшъхьафхэмкIэ Iэзэрэ врач 14-мэ сабый 210-мэ япсауныгъэ ауплъэкIугъ, 264-мэ упчIэжьэгъу афэхъугъэх.

Адыгеим щыпсэухэрэм щыкIагъэу яIэм къыпкъырыкIыхэзэ мыщ фэдэ Iофтхьабзэхэр рес­публикэм джыри щызэхащэщтых, ащ пае шIокI имыIэу ищыкIа­гъэр — закъыфэзыгъазэхэрэм медицинэ ухъумэнымкIэ полисыр яIэныр ары.