Адыгэ Республикэм хэгъэгу кIоцI IофхэмкIэ иминистрэу, полицием иполковникэу Иван Бахиловым иунашъокIэ Урысыем и МВД иотделэу Тэхъутэмыкъое районым щыIэм ипащэу агъэнэфагъ полицием иподполковникэу Гъыщ Андзаур Казбек ыкъор.

Иван Бахиловым ведомствэм иIофышIэхэм А. Гъыщыр нэIуасэ афишIыгъ. ИсэнэхьаткIэ IэпэIэсэныгъэу ыкIи шIэныгъэу IэкIэ­лъым яшIуагъэкIэ, джащ фэдэу цыхьэу къыфашIыгъэр къыгъэшъыпкъэ­жьызэ оперативнэ къулыкъум иIофшIэнкIэ хэхъоныгъэхэр ышIынхэу зэрэщыгугъырэр министрэм къыриIуагъ.

Цыхьэ къыфашIи пшъэдэкIыжьышхо зыпылъ IэнатIэ къызэрэфагъэшъошагъэм фэшI Гъыщ Андзаур ирэзэныгъэ гущыIэхэр министрэм фигъэзагъэх. Щытхъу хэлъэу иIофшIэн зэригъэцэкIэщтымкIэ гущыIэ къытыгъ.

Нэужым зиIофшIэнкIэ къахэщыгъэ къулыкъушIэхэм щытхъу тхылъхэр аратыжьыгъэх. Ащ ыуж Тэхъутэмыкъое район администрацием ипащэу Шъхьэлэхъо Азмэт, муниципалитетым ихэбзэухъумэкIо, лъыплъэн ыкIи хьыкум къулыкъухэм япащэхэр зыхэлэжьэгъэхэ IофшIэн зэхэсыгъо министрэм зэхищагъ.

БзэджашIэхэм апэуцужьыгъэнымкIэ шIыкIэ-амалэу щыIэхэм ыкIи хэбзэукъоныгъэхэр пэшIорыгъэшъэу щыгъэзыегъэнхэм зэхэ­сыгъом щытегущыIагъэх. Анахьэу анаIэ зытырагъэтыгъэр псэупIэу ахъункIэхэрэм ыкIи Iудзыгъэ шIыкIэм тетэу гъэпцIагъэ зыхэлъ бзэджэшIагъэу зэрахьэхэрэм якъыхэгъэщын ары.

Зэхэсыгъом икIэухым Иван Бахиловым отделым ипащэу агъэ­нэфэгъэ Гъыщ Андзаур пшъэрылъ гъэнэфагъэхэр фишIыгъэх. Джащ фэдэу къулыкъухэм япащэхэм ыкIи министерствэм иаппарат иподразделениехэм къафигъэпытагъ методическэ ыкIи практическэ IэпыIэгъу Тэхъутэмыкъое районым иполицие икъулыкъушIэхэм аIэкIагъэхьанэу. Ащ нэмыкIэу, отделым мылъку IэпыIэгъу ратыным ыкIи техникэкIэ зэтегъэпсыхьэгъэным министрэм ынаIэ тыригъэтыгъ.