Зыщымыгъэнэфэгъэ чIыпIэм щашIыгъэхэу…
Илъэс заулэ хъугъэу ООО-у «ЭкоЦентрэм» республикэм хэкIыр щыIуещы, чIыпIэ гъэнэфагъэхэм ар арещалIэшъ, зэрар къымыхьыным пае егъэкIоды.
Арэу щытми, зыщымыгъэнэфагъэм хэкIитэкъупIэхэр щашIынхэр джыри бэмэ ханагъэп. Джырэблагъэ Мыекъопэ къэлэ администрацием хэхьэрэ псэупIэхэм ащ фэдэ итэкъупIэхэр ащаIуахыжьыгъэх. Iофым «Благоустройство» зыфиIорэ компанием итехникэ, иIофышIэхэр хэлэжьагъэх. Ахэм къаугъоигъэ хэкIыр «ЭкоЦентрэм» иавтомашинэхэм Iуащыгъ.
Къутырэу Гавердовскэм, станицэу Ханскэм, поселкэхэу Родниковэм, Севернэм, Мыекъуапэ иурамэу Низпоташнэм хэкIитэкъупIэхэр ащашIыгъэхэу Iуахыжьыгъэх. ХэкI кубометрипшI пчъагъэ региональнэ операторым дищыгъ.
Къалэм изэтегъэпсыхьанкIэ ыкIи псэупIэ-коммунальнэ хъызмэтымкIэ Мыекъуапэ и ГъэIорышIапIэ къызэрэщаIуагъэмкIэ, мэфэ фабэхэр къэкIуагъэх, ащ фэдэ хэкIитэкъупIэхэр джыри нахьыбэ хъущтых, арышъ, ахэм ягъэкъэбзэн зэпагъэущтэп, шIыхьафхэри къызфагъэфедэхэу къыхэкIыщт.
Джащ фэдэу санитарнэ шапхъэхэр гъэцэкIагъэ зэрэхъурэм лъыплъэрэ специалистхэм зыщымыгъэнэфэгъэ чIыпIэм щагъэпсыгъэ итэкъупIэхэм якъыхэгъэщын ынаIэ тет. 2020-рэ илъэсэу икIыгъэм ащ фэдэу 24-рэ Iуарагъэхыжьыгъ. Санитарнэ шапхъэхэр зымыгъэцэкIагъэхэм апае пстэумкIи протокол 339-рэ зэхагъэуцуагъ, сомэ миллион фэдиз тазырэу атыралъхьагъ.