ГъэпцIагъэ зыхэлъ бзэджэшIагъэ зэрахьагъэу зэрагъэмысэ­хэрэм къыхэкIэу Джэджэ район администрацием ипа­щэ игуадзэщтыгъэм ыкIи народнэ депутатхэм я Совет идепутат къафызэIуахыгъэ Iофым ихэплъэн ыкIэм фэ­кIуагъ.

ЩынэгъончъэнымкIэ федеральнэ къулыкъум Урысыем и Следственнэ комитет иследственнэ ГъэIорышIапIэу Адыгэ Республикэм щыIэм анахь Iоф хьылъэхэм язэхэфынкIэ отделым къыIэ­кIигъэхьэгъэ материалхэмкIэ Джэджэ район администрацием ипащэ игуа­дзэщтыгъэм ыкIи народнэ депутатхэм я Совет идепутат алъэныкъокIэ къызэIуахыгъэ уголовнэ Iофым изэхэфын аухыгъ. АшIэзэ гъэпцIагъэ зыхэлъ бзэджэшIагъэ зэрэзэра­хьагъэм фэшI нэбгыритIури агъэмысэх.

Следствием зэригъэу­нэфыгъэмкIэ, лажьэ зи­Iэхэм гъэпцIагъэкIэ АР-м псэолъэшIынымкIэ, транспортымкIэ, псэупIэ-ком­му­нальнэ ыкIи гъогу хъыз­мэтымкIэ и Министер­ствэ иахъщэ къызIэкIагъэ­хьан гухэлъ яIагъ. Ащ пае 2019-рэ илъэсым бэдзэогъум къыщегъэ­жьагъэу шышъхьэIум нэс Джэджэ район администрацием ипащэ игуадзэу Iоф зышIэщтыгъэм агъэмысэрэ ятIонэрэм зэзэгъыныгъэ нэпцI ди­шIыгъ муниципальнэ программэу «Къэлэ щыIэкIэшIу гъэпсыгъэныр» зыфиIорэм къыдыхэлъыта­гъэу районым ит ЕгъэшIэрэ машIом ыкIи ащ къыпэгъунэгъу паркыр зэ­тегъэпсыхьэгъэнхэмкIэ IофшIэнхэр агъэцэкIэнхэу. ГъэпцIакIохэм ашIэзэ агъэ­цэкIэщтым ыкIи Iоф­шIэнхэм ахъщэу апэIухьащтым бащэ ха­гъэхъуагъ. Ащ къыхэкIэу сомэ милли­онрэ мин 700-рэ министер­ствэм зэрар рагъэшIыгъ.

Мы уахътэм уголовнэ Iофыр хьыкумым IэкIа­гъэхьагъ.