Гъэмэфэ зыгъэпсэфыгъо уахътэм тефэу кIэлэцIыкIу ла­герьхэм агъэкIорэ сабыйхэм къафащэфырэ путевкэ­хэм ауасэ ызыныкъо хабзэм афитынэу единороссхэм къызаIом, В. Путиным адыригъэштагъ.

Программэм игъэцэкIэн пэIуагъэхьанэу Правительствэм сомэ мил­лиарди 5 къытIупщыгъ.

Унагъом, бзылъфыгъэ­хэм ыкIи кIэлэцIыкIухэм яIофыгъохэмкIэ Къэра­лыгъо Думэм икомитет итхьаматэу Окунева Ольгэ къызэриIорэмкIэ, лагерьхэр къызэIуамыхыхэзэ, сабыйхэм афащэфырэ пу­тевкэхэм ауасэ ызыныкъо къаратыжьыжьыным мы лъэхъаным ­яшъыпкъэу Iоф дашIэ. Сабыйхэм янэ-ятэхэм агъэхьазырын фэе тхылъхэр Ростуризмэм къы­гъэнэфагъэх, лагерьхэм япащэхэм сабыйхэр игъом къазэрафащэщтхэм ыкIи зэрапэгъокIыщтхэм зы­тырагъэпсыхьэ.

«Совет матерей России» зыфиIорэ движением итхьаматэу, «Народнэ фронтым» иэкспертэу Буц­кая Татьянэ кIэлэцIыкIу­хэм афагъэнэфэгъэ «туристическэ кешбэкыр» бэ­мэ агу зэрэрихьыгъэр ыкIи бэмэ къызэрэзыфагъэфедэщтыр ицыхьэ те­лъэу къыIуагъ.

Зисабый лагерым зыгъакIо зышIоигъо ны-ты­хэм путевкэ осэныкъор къа­зэраратыжьыщт шIыкIэм фэшъхьафэу лагерьхэр зыдэщыIэхэ чIыпIэхэр, ахэм язытет зыфэдэр ха­бзэм иIофышIэхэм ауплъэ­кIугъэмэ зэрагъашIэ.

КIэлэцIыкIухэр зиIэ пстэу­ми ахъщэкIэ хабзэр къазэрадеIэщтыр ягуапэ хъугъэ. Путевкэ уасэм къы­зэрэщагъакIэрэм нэмыкIэу, пандемие лъэхъа­ным ыуж сабыйхэм шъхьа­фитэу загъэпсэфын зэра­лъэкIыщтым ахэм уасэ фашIы.