2021-рэ илъэсым поселкэу Инэм итхылъеджапIэу N 3-р ыкIи Нэты­хъое тхылъеджапIэр (Тэхъутэмыкъое район) къызызэIуахыгъэхэр илъэс 30 мэхъу. А пчъагъэр мыбэми, гъэхъагъэу яIэр макIэп.1991-рэ илъэсым тхылъеджапIэхэм якъызэIухын зиIахьышIу хэзылъхьагъэр IофшIэным иветеранэу, культурэм изаслуженнэ IофышIэу Цушъэкъо Светлан. КIэлэцIыкIу тхылъеджапIэм ипащэу илъэс 50 Iоф ышIагъ, мы илъэсым ащ ыныбжь илъэс 85-рэ хъугъэ. Илъэс 50-м къыкIоцI пэрытныгъэ зыIыгъэу Iоф зышIагъэмэ ащыщ, библиотекарь ныбжьыкIабэ ыгъэсагъ. Инэм тхылъеджапIэр зычIэт унэр зэ­рэцIыкIур, чIыпIэу зыдэщытыр зэрэмытэрэзыр, ар къызэхэоным ищынагъо зэрэщыIэр Тэхъу­тэмыкъое район администра­цием ипащэу Шъхьэлэхъо Аз­мэти, администрацием иIоф­хэмкIэ гъэIорышIакIоу Хьатитэ Сими агурызыгъэIуагъэр Цу­шъэкъо Светлан ары. А чIыпIэм тхылъеджапIэр къычIахыжьи Инэм игупчэ къахьыжьыгъ. Ащ нэмыкIэу, Нэтыхъое къо­джэ цIыкIум тхылъеджапIэ зэ­рищыкIагъэр къэнэфагъ. Ар зычIэтыщтыри къагъоти, къызэIуахыгъ, ищыкIэгъэ пстэури къафищагъ. Анахь дэгъоу Iоф зышIэу районым итхэм мы тхылъеджапIэхэр ащыщ хъугъэх.

Инэм тхылъеджапIэу N 3-р зычIэт унэр ины, гохьэу зэIу­хыгъ. КIэлэцIыкIухэм янэ-ятэхэр ягъусэхэу еджэпIэ залым Iоф­тхьэбзэ гъэшIэгъоныбэ щызэхащэ, цIыфыби ахэм къякIуалIэ.

Илъэс зэфэшъхьафхэм районым, республикэм ащыкIохэрэ зэнэкъокъухэм — «Читатель-2007-рэ», «О мужестве, о славе, о Победе», «Реклама — двигатель успеха», «Есть в памяти мгновения войны», «Рес­публика — наш общий дом» зыфиIохэрэм хагъэунэфыкIырэ чIыпIэхэр къащыдахыгъ. Тхылъеджэ чанхэм ащыщэу А. Поляковар кIэлэцIыкIу зэнэкъокъоу «С голубем белым на детской ладошке» зыфиIорэм хэлажьи, республикэмкIэ апэрэ чIыпIэр къыщихьыгъ. Зэшыпхъухэу ЦIыкIу Даринэрэ Заринэрэ рес­публикэм щыкIогъэ зэнэкъо­къухэу «Рукотворная книга», «Живое слово о войне» зыфиIохэрэм а 1 — 2-рэ чIыпIэхэр къащыдахыгъэх. ТхылъыкIэ 30-м ехъумэ лъэтегъэуцо афашIыгъ. Тхылъеджэхэм ашIогъэшIэгъонынэу ашIошIырэ тхылъхэм цIэхэр хэтхэу буклетхэр, па­мяткэхэр кIэракIэу зэхагъэуцуагъэх.

ТхылъеджапIэм ипащэу Сергусе Фатимэ «Илъэсым ибиб­лиотекарь анахь дэгъу» зыфи­Iорэ зэнэкъокъум апэрэ чIыпIэр къыщихьыгъ. Фатимэ культурэмкIэ академиер къыухыгъ. Иапэрэ лъэбэкъухэр Тэхъутэмыкъое район тхылъеджапIэм щыри­гъэжьагъ, ипащагъ, нэужым гъо­тыгъое тхылъхэм яотдел Iоф щишIагъ. Унагъо зехьэм, Инэм тхылъеджапIэм ыгъэзэжьыгъ, ащ ипащэу илъэс 35-м къехъугъэу Iоф ешIэ. ШIу ылъэгъурэ сэнэхьатым шIыкIакIэхэр къыфигъотыхэзэ, тхылъеджэхэр зы­фещэх. Дэгъоу Iоф зэра­шIэ­рэм къыкIэкIуагъэх рес­публикэ, район мэхьанэ зиIэ щытхъу ыкIи рэзэныгъэ тхылъхэр.

Илъэс пчъагъэ хъугъэу ащ Iоф дешIэ Шъхьэлэхъо Бармэт. НэбгыритIур зэдеIэжьхэзэ адыгэмэ яшэн-хэбзэ дахэхэр къизыIотыкIэрэ Iофтхьабзэхэр бэу рагъэкIокIых. Ахэм ащыщых «Гъогу маф, ИлъэсыкIэр!» зыфиIорэ лъэтегъэуцохэр, чэщ­дэсыр, кушъэхапхэр, адыгэ быракъым, адыгабзэм, адыгэ шъуашэм ямафэхэр. Мыхэм цIыфыбэ ахэлэжьагъ, ныбжьыкIэхэм ашIогъэшIэгъоныгъ. Iоф­тхьабзэхэм къарагъэблэгъагъэх усакIохэр, тхакIохэр, артистхэр, культурэм иIофышIэхэр. Ахэм язэхэщэнкIэ IэпыIэгъушIу къа­фэхъух кIэлэегъаджэхэр, музеим, кIэлэцIыкIу IыгъыпIэм яIофышIэхэр.

Юбилеим фэгъэхьыгъэу си­Iоф­шIэгъухэм сафэгушIо! тапэкIи гъэхъагъэхэр ашIыхэу, ящытхъу бэрэ аIоу Iоф ашIэнэу сафэ­лъаIо. Аферым, пшъашъэхэр!

Хьахъурэтэ Светлан. IофшIэным иветеран, культурэм изаслуженнэ IофышI.