Сэлам зэхыкIэхэм къахэхъуагъ
СызэцIыкIум сянэжъ «ЦIыфэу плъэгъурэм сэлам ех. Сэлам пхыныр, ебгъэблэгъэныр, фэныкъом удеIэныр цIыфыгъэм щыщых», — ыIоу бэрэ зэхэсхыщтыгъ.
Ар сыгу къыгъэкIыжьыгъ джырэблагъэ синэIосэ бзылъфыгъэм къысиIуагъэм: «Непэ ныбжьыкIэхэм сэлам зэхыкIэ гъэшIэгъонхэр къагъотыгъэх. НэбгыритIу зызэIукIэкIэ яцокъэ лъапэхэр е аIэмычIэ зэчIэлъхэр зэрагъэутэкIых».
Сэлам пхыным цIыфым угу зэрэфэшIур, зыщыщ умышIэрэми мыхъун зэрэфимылъыр къеушыхьаты. Адыгэхэм, адрэ цIыф лъэпкъхэм афэдэу, ар хэ- бзэ дахэу ахэлъ. Ау сэлам зэхыкIэу тиIэхэр зэфэшъхьафых. Ахэм ахэтых адыгэхэм ежь къыхахыгъэхэри, нэмыкI лъэпкъхэм къахэкIыгъэхэри.
ГъэшIэгъоныр, щыIэныгъэм зэхъокIыныгъэу хэхъухьэхэрэм, охътэ зэблэкIхэм ахэр зэряпхыгъэхэр ары. Непэ адыгэхэм ясэлам зэхыкIэ зэпахырэ узэу дунаир зэлъызыкIугъэм зэхъокIыныгъэхэр къыхилъхьагъэх. Джы IаплI зэращэкIыжьырэп, Iапэр аубытыжьырэп, яцокъэ лъапэхэр, аIэбжымхэр зэрагъэутэкIых, «Привет!» аIоу зэблэкIыхэуи мэхъу.
ЛIэшIэгъу заулэкIэ узэкIэIэбэжьымэ, адыгэхэм «Сэлам алейкум» зыIорэм «О уалейкум сэлам» раIожьыщтыгъ. Ар ислъам диныр заштэр ары къызахэхьагъэр. IаплI зэщэкIынэр щыIагъэп, уахътэм къыздихьыгъ.
Тара ежь адыгэхэм ясэлам зэхыкIэ шъыпкъэр, тара нэмыкI лъэпкъхэм къахахыгъэр? Сыдигъо сыд фэдэ сэлам зэхыкIэр къахэхьагъа? Джащ фэдэу упчIабэ къэтэджы. Ахэм научнэ IофшIэгъэ псау къапыкIыщт, сэ зэхэсфынхэу гухэлъ сиIэп, сэлам зэхыкIэ зэхэпхъагъэу сигъашIэ щыслъэгъугъэхэр ары мы тхыгъэр зыфэгъэхьыгъэр.
ЫпэкIэ зигугъу къэсшIыгъэхэм анэмыкIэуи непэ, гущыIэм пае, хъулъфыгъитIу гъогум щызэIукIэмэ, аIэ джабгъухэр къызэфаIэтэу зэбгъукIохэу мэхъу, япаIохэр зэфызыщахэу е шъхьащэ зэфашIэу къыхэкIы. ГущыIэкIи «Уипчэдыжь шIу», «Уимафэ шIу», «Уипчыхьэ шIу» зэтэIо, «Тхьэм шIу уелъэгъу», «Тхьауегъэпсэу» джэуап тэтыжьы. НыбжьыкIэхэм «Сэлам» гущыIэр зэраIожьы, кIалэхэм аIапэ зэрагъэубыты, анэгушъохэр зэнагъэсхэуи мэхъу.
КъызэрэтIуагъэу, коронавирусыкIэу къежьагъэм, нэмыкI цIыф лъэпкъхэм афэдэу, адыгэхэми ящыIэныгъэ зэхъокIыныгъабэ къыхилъхьагъ. Сэлам зэхыкIэри зэу ахэм ащыщ. Ау «Хьадэгъум нэмыкI хэкIыпIэ зимыIэ щыIэп» аIуагъ, ащи хэкIыпIэ къыфагъотыгъ.
ЦУЕКЪО Нэфсэт.