Гур къытемыорэми, къытхэт
Урысыем къыщежьэгъэ бэнакIэу самбэмкIэ дунаим, Европэм цIэрыIо ащыхъугъэ Хьэпэе Хьамидэ фэгъэхьыгъэ шIэжь зэнэкъокъу Тэхъутэмыкъуае щыкIуагъ.
Адыгэ Республикэм изэIухыгъэ зэIукIэгъухэм 2004 – 2006-рэ ыкIи 2007 – 2008-рэ илъэсхэм къэхъугъэ кIалэхэр ахэлэжьагъэх. Абхъазым, Къэбэртэе-Бэлъкъарым, Къэрэщэе-Щэрджэсым, Ростов хэкум, Къырым, Къалмыкъым, Краснодар краим, Адыгеим ябэнэкIо 300 фэдиз алырэгъум щызэIукIагъ.
Зэнэкъокъум изэхэщэн кIэщакIо фэхъугъэх Тэхъутэмыкъое районым иадминистрацие физкультурэмкIэ ыкIи спортымкIэ игъэIорышIапIэ, Адыгэ Республикэм самбэмкIэ испорт еджапIэ. Урысыем, Адыгеим язаслуженнэ тренерэу Хъот Юныс зэхэщакIохэм зэрахэтым дакIоу, зэнэкъокъум исудья шъхьаIэу щытыгъ.
Куп 12-мэ кIалэхэр ащыбэнагъэх. Адыгеим щыщхэу хагъэунэфыкIырэ чIыпIэхэр къыдэзыхыгъэхэр къахэтэгъэщых.
Мэлгощ Адам, кг 53-рэ, Кобл Рэмэзан, кг 58-рэ, КушпIэ Къэплъан, кг 64-рэ, Нащ Расул, кг 71-рэ, Мамхыгъ Астемир, кг 89-рэ, Мэлыщэ Аскэр, кг 89-м къехъу, ШъэуапцIэкъо Ибрахьим, кг 42-рэ, апэрэ чIыпIэхэр къыдахыгъэх.
Кушъу Тамерлан, кг 49-рэ, СтIашъу ТIахьыр, кг 71-рэ, ДыдыкI Айтэч, кг 79-рэ, Хъот Тамерлан, кг 42-рэ, ятIонэрэ чIыпIэхэр къахьыгъэх.
Нэгъуцу Мурат, кг 34-рэ, Хьакъуй Эльдар, кг 49-рэ, Хьадпэшъо Дамир, кг 53-рэ, СтIашъу Эльдар, Хьатхъохъу Рустам, кг 58-рэ, Блэгъожъ Сэлым, кг 71-рэ, Янэкъо Ислъам, кг 79-рэ, ящэнэрэ чIыпIэхэр къафагъэшъошагъэх.
Хьэпэе Хьамидэ Тэуйхьаблэ къыщыхъугъ, дунаим изэнэкъокъу тыжьыныр, Европэм дышъэр къащыдихыгъ. Урысыем изаслуженнэ тренер, Дунэе категорие зиIэ судьяу щытыгъ. Игъонэмысэу зыгу къэуцуи дунаим ехыжьыгъэ Хьэпэе Хьамидэ цIыфышIоу, спортсмен ыкIи тренер цIэрыIоу, судья дэгъоу самбэмкIэ зэрэщытыгъэр, ыгъэсэгъэ бэнакIохэм пIуныгъэ дэгъу аритын зэрилъэкIыгъэр тщыгъупшэрэп. ИшIушIагъэкIи непи къытхэтэу зэралъытэрэр зэнэкъокъум нэбгырабэмэ къыщаIуагъ.
ХагъэунэфыкIырэ чIыпIэхэр къыдэзыхыгъэхэм зэхэщакIохэр, тренерхэр, Хь. Хьэпаим иIахьылхэр, ныбджэгъухэр афэгушIуагъэх, шIухьафтынхэр аратыжьыгъэх. Тэхъутэмыкъое районым иадминистрацие физкультурэмкIэ, спортымкIэ игъэIорышIапIэ ипащэу Джарымэкъо Азэмат зэхэщэн Iофыгъохэр дэгъоу зэрэзэрихьагъэхэм фэшI зэнэкъокъум хэлэжьагъэхэм «тхьауегъэпсэу» раIожьыгъ.
Сурэтым итхэр: хагъэунэфыкIырэ чIыпIэхэр къыдэзыхыгъэхэр, тренерхэр.