ЖъоныгъуакIэм и 21-р — я ХIХ-рэ лIэшIэгъум щыIэгъэ Кавказ заом хэкIодагъэхэм япхыгъэ шъыгъо- шIэжь Маф
Адыгэ Республикэм щыпсэухэу лъытэныгъэ зыфэтшIыхэрэр!
ЦIыфлъэпкъым итарихъ къыхэхъухьэгъэ заохэу анахь кIэух тхьамыкIагъо зыфэхъугъэхэм ыкIи анахь илъэсыбэ зыукъудыигъэхэм ащыщыр – я ХIХ-рэ лIэшIэгъум щыIэгъэ Кавказ заор мы мафэм, илъэси 157-кIэ узэкIэIэбэжьмэ ухыгъэ хъугъэ.
Илъэс къэс жъоныгъуакIэм и 21-м а зэо тхьамыкIагъоу хьазабыбэ къытфэзыхьыгъэм, Адыгеим итарихъ хэмыкIокIэжьын лъэуж къыхэзгъэнагъэм хэкIодэгъэ тятэжъ пIашъэхэм лъхъанчэу шъхьащэ афэтэшIы.
БлэкIыгъэм зызыфэдгъазэкIэ, мамырныгъэмрэ зэгурыIоныгъэмрэ шIуагъэу яIэм нахь осэшхо фэтэшIы, гухэлъышIухэр къыддэхъунхэм пае зыкIыныгъэ тхэлъын зэрэфаем, мамыр ошъогур ашъхьагъэу тикIэлэцIыкIухэмрэ ахэм къакIэхъухьащтхэмрэ ячIыгу гупсэ тынчэу щыпсэунхэ зэрэфаем нахь тягупшысэ.
ТичIыпIэгъу лъапIэхэр, тыгу къыддеIэу тышъуфэлъаIо зэкIэми псауныгъэ, щыIэкIэшIу шъуиIэнэу, шъурэхьатынэу, шъуигуфэбагъэ къыкIимычынэу! ТичIыгу гупсэ егъашIэми зао къыщэрэмыхъужь!
Адыгэ Республикэм и ЛIышъхьэу, Урысые политикэ партиеу «Единая Россия» зыфиIорэм и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожный