Къэралыгъо Думэм и Комитетэу физическэ культурэм, спортым, зекIоным ыкIи ныбжьыкIэ Iофхэм афэгъэзагъэм изэхэсыгъо Урысыем спортымкIэ и Министерствэ щыкIуагъ.

Комитетым изэхэсыгъо тхьа­мэтагъор щызэрихьагъ Борис Пайкиным, ащ хэлэжьагъ Урысые Федерацием спортымкIэ иминистрэу Олег Матыциныр.

2022 – 2024-рэ илъэсхэм федеральнэ бюджетым къыхагъэкIынышъ, физкультурэмрэ спортымрэ алъэныкъокIэ проектхэмрэ программэхэмрэ апэIуагъэхьащт мылъкум епхыгъэ Iофыгъохэм мы Iофтхьабзэм хэлажьэхэрэр атегущыIагъэх. Джащ фэдэу зыхэплъагъэхэ Iофыгъохэм ащыщыгъэх программэ гуадзэу «Спорт на селе» зыфиIорэмрэ проектэу «Земский тренеркIэ» зэджагъэ­хэмрэ.

Урысые Федерацием спортымкIэ иминистрэу Олег Матыциным Адыгэ Республикэм ыцIэкIэ Къэралыгъо Думэм идепутатэу Хьасанэкъо Мурат физическэ культурэмрэ спортымрэ яхэхъоныгъэ иIахьышхо зэрэхишIыхьагъэм пае Рэзэныгъэ тхылъ къыритыжьыгъ.

— Ведомствэм сиIофшIэн осэшхоу къыфишIыгъэр спорт­сменэу сызэрэщытым елъытыгъэу анахьэу етIани гуапэ сщыхъугъ. Адыгэ Республикэм ипащэхэр, партиеу «Единэ РоссиемкIэ» синыбджэгъухэр, хэ­дзакIохэр сигъусэхэу тапэ­кIи спортым хэхъоныгъэ зэри­шIыщтым сынаIэ тезгъэтыщт, — хигъэунэфыкIыгъ Хьасанэкъо Мурат.

Къандор Анзор. Урысые Федерацием и Федеральнэ ЗэIукIэ и Къэ­ра­лыгъо Думэ идепутат иIэпыIэгъу.