Кавказ заор 1864-рэ илъэсым зэраухыгъэм фэгъэхьыгъэ шIэжь зэхахьэхэр жъоныгъуакIэм и 21-м Адыгэ Республикэм щыкIощтых.

Iофтхьабзэм изэхэщэкIо куп изэхахьэ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэп­къэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет щырекIокIыгъ. Комитетым итхьаматэу Шъхьэлэхъо Аскэр къызэриIуа­гъэу, шъыгъо- шIэжь мафэм фэгъэхьыгъэ зэхахьэхэр Мыекъуапэ, Адыгэкъалэ, район гупчэхэм, къуаджэхэм ащыкIощтых. Зэхэщэн Iофыгъохэр уахътэм диштэу агъэцакIэх.

Концерт-реквиемым ихудожественнэ Iофыгъохэм афэгъэзэгъэ режиссерэу Хьакъуй Аслъан ансамблэхэу «Ислъамыер», «Ошъутенэр», «Ошъадэр», «Ащэ­мэзыр», Лъэпкъ театрэу Цэй Ибрахьимэ ыцIэ зыхьырэр шIэжь Iофтхьабзэм зэрэхэлэжьэщтхэм, лъэпкъ гупшысэр пхыращызэ ятворческэ амалхэр зэрагъэфедэщтхэм къытегущыIагъ.

ЗэхэщэкIо купым хэтхэу ЦIыкIушъо Аслъан, Кушъу Светланэ, Къулэ Мы­хьамэт, ГъукIэлI Асхьад, Мурад Гощлъа­пIэ, ГъукIэлI Сусанэ, Амур Рузанэ, Анцокъо Фатимэ яеплъыкIэхэр зэхахьэм къыщаIуагъэх.

Республикэ общественнэ движениеу «Аыгэ Хасэм» игъэцэкIэкIо куп хэтэу ЦIыкIушъо Аслъан зэрэхигъэунэфыкIыгъэу, шъыгъо-шIэжь зэхахьэм Адыгеим щыпсэухэрэ лъэпкъхэм яобщественнэ движениехэм ялIыкIохэр Iофтхьабзэм зэрэхэлэжьэщтхэм пэшIорыгъэшъэу Адыгэ Хасэм щытегущыIагъэх.

Шъхьэлэхъо Аскэр изэфэхьысыжьхэм къащыхигъэщыгъ филармонием ыпашъхьэ щызэхащэщт зэхахьэр хэбзэ шапхъэ иIэу зэрэкIощтыр. Районхэм зэпхыныгъэхэр адыряIэщтых, зыкIыныгъэ ахэлъэу Iофтхьабзэр рагъэкIокIыщт.