Псыхъоу Шъхьэгуащэ инэпкъхэу Мыекъопэ къэлэ паркым дэжь щыIэхэм ягъэкIэжьын ыкIи къапэIулъ чIыпIэхэм язэтегъэпсыхьан Адыгеим социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ Унэе программэм къыдыхэлъытагъэхэм зэу ащыщ. ПстэумкIи сомэ миллион 405,7-рэ ащ пэIухьащт. Проектым къыдыхэлъыта­гъэхэм япхырыщын илъэсэу тызыхэтым игъэтхэпэ мазэ ыуж ихьагъэх. Апэ псыхъо нэпкъхэм къащырагъэжьагъ. ЫпэрапшIэу техникэр екIолIэн ылъэкIынэу къагъэкъэбзагъ, мы уахътэм нэпкъыр зэхэмыоным пае Iуалъ­хьэгъэгъэ мыжъо зэхэгъэпкIэгъэшхоу жъы хъугъэхэр Iуахых. ПсэолъэшIхэм къызэраIуагъэмкIэ, гъэмэфэ уахътэм псыхъом псэу итым къызыщыкIэкIэ, ащ ычIэ агъэкъэбзэнышъ, мыжъо гъэпкIагъэхэр кIэу агъэтIылъыщтых.

ПстэумкIи километритIурэ метрэ 500-рэ фэдиз агъэпытэн фаеу щыт. Ащ щыщэу километрэрэ метрэ 350-р бассейнэу къэлэ паркым хахьэрэм ылъэныкъокIэ къэгъэзагъ, километрэрэ метрэ 200-р адырэ­бгъумкIэ щыI.

Псыхъоу Шъхьэгуащэ инэпкъ­хэм ягъэпытэн имызакъоу, ащ къыпэIулъ чIыпIэхэр гъэпсэфыпIэу къэлэдэсхэм афашIынэу проектым къыдыхэлъытагъ. Бассейныри къагъэнэжьынэу ары гухэлъэу яIэр. Ар мы уахътэм нэкIы. Проектэу псэуалъэр зэрагъэкIэжьыщтым игъэхьазырын ыуж итых. Ащ ычIэ ыкIи инэпкъхэм ямызакъоу, псыр къызэрэрагъахьэрэ ыкIи ар зэрэзэблахъурэ системэхэри икIэрыкIэу ашIыжьыщтых.

Псыхъом инэпкъхэр мы илъэ­сым ишэкIогъу мазэ нэс агъэпытэнхэу ары зэрагъэ­нафэрэр, зэкIэ IофшIэнэу проектым къы­дыхэлъытагъэхэр 2022-рэ илъэ­сым аухын гу­хэлъ яI.

Хъут Нэфсэт.