Федеральнэ телеканалэу «Матч-ТВ» зыфиIорэм ижурналистхэмрэ республикэм ихэбзэ къулыкъухэм ялIыкIохэмрэ якупхэр тыгъуасэ Мыекъуапэ истадион футбол щызэдешIагъэх.

Телеканалэу «Матч-ТВ» зыфиIорэм ижурналистхэмрэ икомментаторхэмрэ жъоныгъуакIэм и 18-м къыщегъэжьа­гъэу Адыгеим щыIэх. Ахэр чIыопс-зыгъэпсэфыпIэ, культурнэ чIыпIэхэм ащыIэщтых. Джащ фэдэу хьакIэхэр республикэм икъушъхьалъэхэм ащагъэх. Адыгеим спортымкIэ амалэу иIэхэм ахэм нэIуасэ зафашIыщт, Адыгэ къэралыгъо университетым истудентхэм апае спортивнэ журналистикэмкIэ мастер-классхэр зэхащагъэх.

Iофтхьэбзэ шъхьаIэхэм ащыщ хъугъэ тыгъосэрэ ешIэгъоу Адыгеим и ЛIышъхьэу КъумпIыл Мурат зыхэлэжьагъэр. ЕшIэгъур рамыгъажьэзэ республикэм ипащэ телеканалэу «Матч-ТВ-м» икуп хэтхэм адэгущыIагъ. Купым щыщэу комментаторэу Нэгъуцу Роман Адыгэ къэралыгъо университетыр къыухыгъ. Георгий Черданцевым янэжъ янэ Адыгеим къыщыхъугъ.

Телеканалэу «Матч-ТВ» зыфиIорэм икомандэ хэтхэм республикэм ипащэхэм «тхьашъуегъэпсэу» къараIуагъ фабэу къазэрапэгъокIыгъэхэм ыкIи культурнэ программэ гъэшIэгъон зэрафызэхащагъэм афэшI. Республикэм спортымкIэ хэбзэ шIагъохэр зэрилъхэм нэмыкIэу, чIыопс-рекреационнэ амал байхэри зэриIэр ахэм къаIуагъ. КъумпIыл Мурат зэрэхигъэунэфыкIыгъэмкIэ, гухэлъэу яIэхэм зэу ащыщ Лэгъо-Накъэ изы­гъэпсэфыпIэ зегъэушъомбгъугъэныр.

«Адыгеим къыщыхъугъэхэми, ще­джа­гъэхэми тиреспубликэ зэращы­мыгъуп­шэрэр, ищытхъу зэрарагъа­Iорэр лъэшэу тигуап. ЦIыфхэр жъугъэу зыхэлэжьэрэ спортми, сэнэхьат спортми зягъэушъомбгъугъэнымкIэ непэ бэ тшIэрэр. Спортым цIыфхэм япсауныгъэ зэригъэпытэщтым тицыхьэ телъ. Зипкъышъол зыгъэпытэхэрэр, щыIэкIэ-псэукIэ тэрэз зиIэхэр нахьыбэ хъухэ тшIоигъу, — къыIуагъ КъумпIыл Мурат.

Тикомандэ хэтхэм щэгъогогъо хьа­кIэхэм якъэлапчъэ Iэгуаор дадзагъ, ащ щыщэу 2-р дэзыдзагъэр республикэм и ЛIышъхьэу КъумпIыл Мурат. Телеканалэу «Матч-ТВ-м» ешIэгъур 4:3-у ыхьыгъ.

ЕшIэгъум ыуж Адыгеим и ЛIышъхьэу КъумпIыл Мурат хьакIэхэм шIэжь кубок аритыгъ, псауныгъэ пытэ яIэнэу афэлъэ­Iуагъ.

Адыгэ Республикэм и ЛIышъхьэ ипресс-къулыкъу