Урысые Федерацием и Президентэу Владимир Путиным УФ-м и Федеральнэ ЗэIукIэ фи­гъэ­хьыгъэ Джэпсалъэу мэлылъфэгъум и 21-м къызэджагъэм псауныгъэм икъэухъумэн чIыпIэ ин щыригъэубытыгъ, гукъэкI зэфэшъхьафхэр къыхьыгъэх, унэшъо гъэнэфагъэхэр къышIыгъэх.

ГущыIэм пае, диспансеризацием джыри нахь зырагъэу­шъомбгъунэу, илъэсэу тызыхэтым ибэдзэогъу мазэ и 1-м ар атIупщынэу Правительствэм, псауныгъэм икъэухъумэнкIэ Министерствэм, шъолъырхэм япащэхэм къариIуагъ. Ар нахь гъэпсынкIэгъэным пае псэупIэхэр къэзыкIухьэзэ цIыфхэм япсауныгъэ изытет зыуплъэкIурэ комплексэу шъолъырхэм яIэхэм джыри ахагъэхъощтэу ары къы­зэриIуагъэр.

Джащ фэдэу IэзэпIэ-гъэпсэфыпIэхэм япсауныгъэ ащызэтырагъэуцожьыныр цIыфхэм нахь къызIэкIэгъэхьэгъошIу афэхъуным фэшI къэралыгъо кIоцI зекIоныр къыхэзыхэу, путевкэ зыщэфыхэрэм ащ пэIуа­гъэхьагъэм ипроцент 20-м къа­фегъэгъэзэжьыгъэным фэгъэ­хьыгъэ программэр илъэсым ыкIэм нэс лъагъэкIотэнэу унашъо къышIыгъ.

Зэпахырэ узым ыпкъ къикIыкIэ цIыфхэм IэкIыбым зыща­гъэпсэфын амалэу яIагъэм къызэрэщыкIагъэр къыдилъытэзэ, ащ фэгъэхьыгъэ программэм УФ-м и Президент кIэщакIо фэхъуи икIыгъэ 2020-рэ илъэсым атIупщыгъ. ШышъхьэIум ащ иапэрэ едзыгъо ежьагъ. Рос­туризмэм къызэритырэмкIэ, ащыгъум нэбгырэ мин 60 ар зыгъэфедэгъагъэр. ЯтIонэрэ едзыгъор чъэпыогъум къыщыублагъэу лъагъэкIотагъ, ящэнэрэр 2021-рэ илъэсэу тызыхэтым игъэтхэпэ мазэ и 18-м атIупщыгъ.

УФ-м и Премьер-министрэу Михаил Мишустиным УФ-м и Къэралыгъо Думэ зэфэхьысыжьэу джырэблагъэ къыщи­шIыгъэм къызэрэщыхигъэщыгъэмкIэ, гъэрекIо къыщегъэ­жьагъэу пштэмэ, Урысыем щыпсэоу нэбгырэ миллион фэдизмэ мы къэралыгъо IэпыIэгъур агъэфедэгъах. Ахэм афарагъэгъэзэжьыгъэр сомэ миллиарди 4 фэдиз мэхъу.

Владимир Путиным унашъоу къышIыгъэм тетэу, жъоныгъуа­кIэм и 12-м къыщыублагъэу программэр лъагъэкIотагъ. Джыри ащ пае УФ-м и Правительствэ сомэ миллиарди 4-м ехъу ыгъэнэфагъ.