Амал дэгъухэр аIэкIэлъ хъугъэ
Мэзым машIом зыкъыщиштэмэ ар зэрагъэкIосэжьыщт автоцистернакIэ АР-м ихэушъхьафыкIыгъэ автоном учреждениеу «Адыгейская лесопожарная охрана» зыфиIорэм джырэблагъэ къыIэкIэхьагъ. Лъэпкъ проектэу «Экология» зыфиIорэм къыдыхэлъытэгъэ федеральнэ проектэу мэзхэм якъэухъумэн фэгъэхьыгъэм игъэцэкIэн хахьэу федеральнэ бюджетым имылъкукIэ техникэр къащэфыгъ.
Мэзыр машIом щыухъумэгъэным автомобилыр фэIорышIэщт, псыр зэрэращырэмкIэ ыкIи хэушъхьафыкIыгъэ Iэмэ-псымэхэмкIэ ар зэтегъэпсыхьагъ. Машинэм шIуагъэу иIэхэм ащыщ сыд фэдэ гъогуи рыкIон зэрилъэкIырэр.
«Республикэм имэз фонд епхыгъэу зы автоцистернэ тиI, ау ар тфикъущтыгъэп. Джы ащ фэдэ машинитIу тIэкIэлъ хъугъэ, ахэр дэгъоу зэрэзэтегъэпсыхьагъэхэм ишIуагъэкIэ игъом ыкIи псынкIэу машIор дгъэкIосэн тлъэкIыщт», — къыIуагъ АР-м ихэушъхьафыкIыгъэ автоном учреждениеу «Адыгейская лесопожарная охрана» зыфиIорэм ипащэу ХъокIо Мурат.
ИлъэситIум къыкIоцI лъэпкъ проектэу «Экологием» къыдыхэлъытэгъэ федеральнэ проектэу «Мэзхэм якъэухъумэн игъэцэкIэн хахьэу машIор зэрагъэкIосэрэ техникэ 12 къулыкъум къыIэкIэхьагъ: бульдозер, экскаватор, вахтэ автомобиль ыкIи гъэлъэшыгъэ шIыкIэм тетэу чIыпIэхэм апхырыкIырэ автотранспорт.