Лъэпкъ проектэу «Дунэе кооперациер ыкIи экспортыр» зыфиIорэм къыдыхэлъытагъэу жъоныгъуакIэм и 24 — 25-м «Мой бизнес» зыфиIорэ Гупчэм Казахстан икомпаниехэм ащыщхэм ялIыкIохэр ихьэкIэщтых.

Экспортым фэгъэзэгъэ Гупчэм зэIукIэгъоу зэхищэщтхэм Адыгеим ихъызмэтшIапIэхэм ялIыкIохэр ахэлэжьэнхэу къырагъэблагъэх. Ащ ипащэу Дидыхъу Алый къызэрэхигъэщыгъэмкIэ, Казахстан ипредпринимательхэм республикэм къыщыдагъэкIырэ продукцием нэIуасэ зыфашIынэу, ащэфынэу ары гухэлъэу яIэр. АшIогъэшIэгъонэу къызкIэупчIэхэрэм ащыщых псэолъэшIыным щагъэфедэрэ материалхэр, унапчъэ­хэр, ахэм ягъусэжьын фаехэр, IэшIу-IушIу­хэм якъыдэгъэкIын ищыкIагъэхэр, тыгъэгъазэм хэшIыкIыгъэ дагъэр, шъонхэр, гъомылэпхъэ зэфэшъхьафхэр.

АР-м экономикэ хэхъоныгъэмкIэ ыкIи сатыумкIэ и Министерствэ къызэрэщаIуагъэмкIэ, жъоныгъуа­кIэм и 26-м Казахстан илIыкIохэм республикэм ихъызмэтшIапIэхэм ащыщхэр къа­кIухьанхэу гухэлъ яI.