Адыгеим истудентхэр фестивалэу «Урысые студентхэм ягъатх» зыцIэм икIэух хэ­ла­жьэх.

«Россия — страна возможностей» зыфиIорэ платформэм къыдыхэлъытагъэу проектыр Урысыем иныбжьыкIэхэм я Союз зэхещэ. ЖъоныгъуакIэм и 15-м къыщегъэжьагъэу и 20-м нэс Нижний Новгород Iофтхьабзэм икIэух щыкIощт.

Адыгэ къэралыгъо университетымрэ ащ иколледжрэ къарыкIыгъэ студент 18-мэ Адыгеир къагъэлъагъо. Купым мыгъэ апэрэу IэкIыбым къикIыгъэ студентхэр хэхьагъэх. Туркменистанрэ Армениемрэ ащыщ ныбжьыкIэхэу республикэм щеджэхэрэр зэнэкъокъум хэлажьэх. Iофтхьабзэм лъэны­къуитIукIэ зыщаушэтыщт. Орэд къэIонымрэ къэшъонымрэ къызэрадэхъурэр ныбжьыкIэхэм къагъэлъэгъощт.

— Сэнаущыгъэ зыхэлъ студентхэм къагъэхьазырыгъэ къэгъэлъэгъон 1184-мэ мыгъэ тяплъыщт. Мы илъэсым апэрэу шIэныгъэ ыкIи художественнэ творчествэр зэхэдгъэхьагъ. Шъори лъэныкъуакIэхэр къызэIушъухынхэу тыкъышъоджэ, — къыIуагъ УФ-м и Общест­веннэ палатэ хэтэу, Урысыем иныбжьыкIэхэм я Союз ипащэу Павел Красноруцкэм.

Адыгеим икIыгъэ купым ипащэу Лидия Муратовам къызэри­IуагъэмкIэ, фестивалыр шъолъы­рым щызэхащэнымкIэ къиныгъо гъэнэфагъэхэр зэпачынэу хъугъэ. БлэкIыгъэ илъэсым зэ­хъокIыныгъэхэр къыздихьыгъэх. НыбжьыкIэхэм бжыхьэм къыщегъэжьагъэу загъэхьазырыгъ ыкIи кIуачIэу яIэр зэкIэ Iоф­тхьабзэм изэхэщэн фагъэзагъ.

— Творчествэм ылъэныкъокIэ къиныгъо тыхэфагъэп, сыда пIомэ мэлылъфэгъум и 15-м шъолъыр фестивалыр къэтыу­хыгъ. ГумэкIыгъо щыIэ зыхъугъэр тхьапэхэм ягъэхьазырын ыуж тызехьэр ары. Ау пстэури къызэтынэкIыгъ ыкIи финалым зыщытыушэтынэу тыкIуагъ. Ныб­жьыкIэхэм зэрифэшъуашэу зы­къагъэлъэгъонэу сащэгугъы, — къыIуагъ Лидия Муратовам.

Зэнэкъокъум ипрограммэ лъэныкъуи 10 хэт: «Шъолъыр программ», «Вокальное», «Инструментальное», «Танцевальное», «Театральное», «Оригинальный жанр», «Мода», «Журналистика», «Видео», «Арт». 2021-рэ илъэсым кIэу «Арт» зыфиIорэ лъэныкъор къыха­гъэхьагъ.

Урысыем культурэм ыкIи искусствэм ащызэлъашIэрэ нэ­бгырэ 60-м ехъу фестивалым экспертэу хэтыщтых.

Лъэпкъ проектэу «Гъэсэ­ныгъэм» къыдыхэлъытэгъэ фе­деральнэ проектэу «Социальные лифты для каждого» зыфиIорэм епхыгъэу фестивалыр зэхащагъ.

Абрэдж Сэтэнай.