2021-рэ илъэсым республикэм щыпсэухэрэм банкхэм къаIахыгъэ чIы­­фэр, блэкIыгъэ илъэсым елъытыгъэмэ, нахьыб.

Мэлылъфэгъум и 1-м ехъулIэу пштэмэ, физическэ лицэхэм чIыфэу ателъыр сомэ миллиард 49,5-рэ мэхъу, ыпэрэ илъэсым мыщ фэдэ иуахътэ пштэмэ, ар процент 12,3-кIэ нахьыб.

Iоф зэфэшъхьафхэм апае аштагъэр сомэ миллиард 33,5-рэ мэхъу, гъэрекIо елъытыгъэ­мэ, проценти 7-кIэ ар нахьыб.

Илъэсэу итым иапэрэ мэзищ республикэм щыпсэухэрэм ипотекэ 716-рэ ашIыгъ, зэкIэмкIи сомэ миллиардрэ миллиони 6-рэ чIыфэу къаIахыгъ. ГъэрекIо джащ фэдэ илъэхъан егъэпшагъэмэ, процент 57-кIэ ащ зыкъиIэтыгъ.

— МыщкIэ зишIуагъэ къэкIуа­гъэр банкхэм ипотекэ чIыфэм процентэу тырагъахъорэр къызэрэрагъэIыхыгъэр ары. Гъэ­рекIо гъэтхэпэ мазэм ехъулIэу республикэм исхэм ипотекэ чIыфэ къаIахыным пае про­центи 8,9-рэ тегъахъо фашIыщтыгъэмэ, мы илъэсым джащ фэдэ илъэхъан процент 6,7-м нэсэу ар къеIыхыгъ, — еIо Урысыем и Банк Адыгэ Рес­публикэмкIэ и Лъэпкъ банк иотделение ипащэу Сергей Самойленкэм.

ЦIыфхэм псэупIэ зэрагъэгъо­тынымкIэ е яIэм зырагъэушъом­бгъунымкIэ ипотекэм ишIуагъэ лъэшэу къэкIо.

Кредитхэм ятын Урысые бан­кым нахь IэшIэх зэришIыгъэр, УФ-м и Правительствэ ипоте­кэмкIэ фэгъэкIотэнхэр къыз­щыдэлъытэгъэ программэм кIэ­щакIо зэрэфэхъугъэр чIы­фэхэм процентэу атехъорэр нахь макIэ хъуным фэIорышIагъэх, цIыфхэм нахь къызIэ­кIэгъэхьэгъошIу афашIыгъ. Мы илъэсым мэлылъфэгъум и 1-м ехъулIэу ипотекэу сомэ мил­лиард 15,9-рэ аштагъ.

ДЕЛЭКЪО Анет.