Мы мафэхэм республикэм ичIыпIэ зэфэшъхьафхэм ошъу къа­щехыгъ. Станицэхэу Дахъомрэ Хъымыщ­кIэйрэ ошъуцэмэ яинагъэ кIэнкIэм фэдиз хъунэу къащытрилъхьэгъагъ. Мыекъопэ районым ипащэу Олег Топоровым иунашъокIэ ошIэ-дэмышIэу къехыгъэ ошъум зэрарэу цIыфхэм къафихьыгъэр къалъытэ. Синоптикхэм зэрагъэунэфырэмкIэ, жъоныгъуакIэм и 18-м республикэм ичIыпIэ зэфэшъхьафхэм ощхышхо къащещхын, ошъу къащехын ыкIи жьыбгъэшхо ащыIэн ылъэкIыщт. УФ-м ошIэ-дэмышIэ IофхэмкIэ и Министерствэ АдыгеимкIэ и ГъэIорышIапIэ цIыфхэм сакъыныгъэ къызыхагъэфэнэу къяджэ. Ушъхьагъу гъэнэфагъэ ямыIэу щагум дэмытынхэу, чъыгхэм, электропроводхэм, гъогу тамыгъэхэм апэблагъэу автомобильхэр амыгъэуцунхэу къяджэх. ОшIэ-дэмышIэ Iоф къэхъугъэмэ шъузытеон шъулъэкIыщтхэр: «01» — къэгъэнэжьакIохэм ятелефон «101» — мобильнэ телефонкIэ узэрэтеощтыр 8(8772)56-80-78 — УФ-м ошIэ-дэмышIэ IофхэмкIэ и Министерствэ АдыгеимкIэ и ГъэIорышIапIэ ицыхьэшIэгъу телефон. (Тикорр.).