Зэрэхэгъэгоу зэлъызыубытыгъэ коронавирусыр къыднэмысыным лъэ­шэу тыщыгугъыгъ, ау уз мэхъаджэр тиреспублики къихьагъэми, ащ ущызыухъумэщт хэкIыпIэхэри щыIэ хъугъэх.

ЖъоныгъуакIэм и 5-м ехъу­лIэу Адыгеим щыпсэурэ нэбгырэ 14473-рэ сымэджагъэ, нэбгыри 180-мэ ядунай ахъожьыгъ. Непэрэ мафэм узыр тIэкIу зэ­кIэкIуагъэми, сымаджэхэр джыри щыIэх. Коронавирусыр къыо­мыузыным пае хэкIыпIэу щыIэ закъор вакцинэр зыхябгъэлъхьа­ныр ары. ГъэрекIо ты­гъэгъэзэ мазэм къыщегъэжьагъэу рес­публикэм ар къащэнэу рагъэ­жьагъ. Непэрэ мафэм ехъулIэу вакцинэр зызщыхябгъэлъхьан плъэкIыщт чIыпIэ 32-рэ рес­публикэм къыщызэ­Iуахыгъ.

Мэ­лылъфэгъум ыкIэм ехъулIэу рес­публикэм ис нэбгырэ 15475-мэ прививкэр ашIыгъах. Нэ­бгырэ 20995-мэ апэрэр зы­халъхьагъэу, ятIо­нэ­рэм ежэх. Шэуджэн районым инароднэ депутатхэм я Совет ипащэу Мэрэтыкъо Аслъани вакцинэр зыхаригъэлъхьагъ. Ащ шIуагъэу къытырэр ыгъэунэфыгъ, ипсауныгъэкIэ къехьылъэкIыгъэп.

— Сипсауныгъэ къэсыухъу­мэным, сиунагъо, сызхэхьэрэ цIыфхэм узыр афэсымыхьыным афэшI семыгупшысэу вакцинэр зыхязгъэлъхьагъ. Апэрэр гъэтхапэм и 1-м къысфашIыгъ, мэфэ 21-рэ зытекIым ятIонэрэр зы­хязгъэлъхьагъ. Сипсауныгъэ зы­парэкIи иягъэ къекIыгъэп. Иммунитетыр къыдэгъэкIоегъэнымкIэ вакцинэм ишIуагъэ къэ­кIощт. Ащ нэмыкI хэкIыпIэ щы­мыIэу сэлъытэ. Арышъ, вак­цинэр зыхэшъулъхьанэу сыкъы­шъоджэ. Гъэмэфэ зыгъэпсэ­фыгъо лъэхъаныр къэсы, ащ ехъулIэу иммунитетыр зыпкъ иуцомэ, узыр къыппыхьащтэп, — еIо Мэрэтыкъо Аслъан.