ЛъэIу тхылъыр имыщыкIэгъэжьэу
2020-рэ илъэсым имэлылъфэгъу мазэ и 15-м къыщегъэжьагъэу ны мылъкум исертификат пае ны-тыхэм лъэIу тхылъ атын ищыкIэгъэжьэп. УФ-м ПенсиехэмкIэ ифонд и Къутамэу АР-м щыIэм испециалистхэм кIэлэцIыкIур къызэрэхъугъэм фэгъэхьыгъэ къэбарэу ЗАГС-м къытыгъэм къыпкъырыкIыхэзэ тхылъхэр агъэхьазырых.
Мы шапхъэр зыщыIэм къыщыублагъэу тызыхэт 2021-рэ илъэсым ижъоныгъуакIэ и 1-м нэс пштэмэ, ащ фэдэу пэIудзыгъэ шIыкIэм тетэу сертификат 2151-рэ Адыгеим щагъэпсыгъ. Программэр зыщыIэ 2007-рэ илъэсым къыщыублагъэу республикэм тхылъэу щатыгъэр 36015-рэ мэхъу.
Джащ фэдэу 2020-рэ илъэсым имэлылъфэгъу мазэ къыщегъэжьагъэу сертификатыр тхьапэм тетэу къатыжьырэп. Тхылъыр электроннэ шIыкIэм тетэу агъэпсы, ар зэрэхьазырыным «иунэе кабинет» е къэралыгъо фэIо-фашIэхэм япортал къырагъахьэ. Ащ зыщябгъэтхынэу ары ныIэп сертификатыр зэрэуиIэр пшIэным ищыкIагъэр.
Унагъохэу кIэлэцIыкIур апIунэу зыштагъэхэм мы шапхъэхэр анэсыхэрэп, ахэм ар къэзыушыхьатырэ тхылъхэри, лъэIу тхылъыри ежьхэм атынхэ фае.
Шъугу къэдгъэкIыжьын, ны мылъкур унагъом псэукIэ амалхэр нахьышIу шIыгъэнхэм, кIэлэцIыкIум гъэсэныгъэ егъэгъотыгъэным апэIуигъэхьан фит, ным ипенсие зыщызэIукIэрэми ыгъэкIон ылъэкIыщт. Джащ фэдэу сабыеу сэкъатныгъэ зиIэр щыIэныгъэм хэгъэгъозэгъэным пае ищыкIагъэхэр къащэфынхэу е ащ къыхэхыгъэу ахъщэ тын мазэ къэс къафэкIонэу агъэпсынэу законым амал къареты.
Унагъом псэупIэ зэригъэгъотыным пае кредит е ипотекэ ыгъэпсыгъэу, ащ ны мылъкур пэIуигъэхьащтмэ, ПенсиехэмкIэ фондым екIолIэн ищыкIэгъэжьэп, банкым зыфигъазэмэ икъущт.
2021-рэ илъэсэу къихьагъэм ны мылъкум къыщыдэлъытэгъэ ахъщэр индексацие ашIыгъ. Джы ар сомэ 483881-рэ зэрэхъурэр. Апэрэ сабый къызэрыхъухьэгъэ унагъоу ны мылъкур къызэратыгъэхэм ятIонэрэр къызафэхъукIэ ащ сомэ 155550-рэ къафыхагъахъо. Зэхэубытагъэу къатефэрэр сомэ 639431,8-рэ мэхъу. Ны мылъкум щыщ Iахьэ зыгъэфедагъэхэм къафэнэгъэ ахъщэри мы илъэсым индексацие ашIыгъ.
Ны мылъкум фэгъэхьыгъэ программэр 2026-рэ илъэсым итыгъэгъазэ и 31-м нэс лъагъэкIотагъ. Ахъщэу къыдэлъытагъэр унагъом зэригъэфедэщтым пIэлъэ гъэнэфагъэ иIэп.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу.