Водитель 54-рэ ешъуагъэу къаубытыгъ

ЖъоныгъуакIэм и 1-м къыщегъэ­жьа­гъэу и 10-м нэс Адыгеим игъогухэм хъугъэ-шIэгъэ 12 ащагъэунэфыгъ, ахэм нэбгыри 5 ахэкIодагъ, нэ­бгы­рэ 11-мэ шъобжхэр атещагъэхэ хъугъэ.

Ащ нэмыкIэу мы уахътэм къыхиубытэу зыпари зыхэмыкIодэгъэ гъогу хъугъэ-шIэгъэ 81-рэ Адыгеим къыщыхъугъ. Ахэр анахьыбэу зыщагъэунэфыгъэхэр Тэхъутэмыкъое районыр (33-рэ) ыкIи къалэу Мые­къуапэ (25-рэ).

Адыгеим икъэралыгъо автоинспекцие къызэритырэмкIэ, хъугъэ-шIэгъэ 15-у агъэунэфыгъэм лъапсэ фэхъугъэр зы машинэр гъунэгъущэу нэмыкI машинэм зэречъэлIагъэр, чэзыур зэраукъуагъэр арых. Джащ фэдэу мэфипшIым къыкIоцI гъогогъу 3170-рэ гъогурыкIоным ишапхъэхэр аукъуагъэхэу хъугъэ-шIагъэхэр къыхагъэщыгъэх. Ешъуагъэу къаубытыгъэ водитель 54-мэ пшъэдэкIыжьхэр арагъэхьыгъэх. Ащ фэдэхэр нахьыбэу къызщыхагъэщыгъэхэр Тэхъутэмыкъое районыр ыкIи Мыекъуапэ арых.

Амыгъэунэфыгъэ чIыпIэм гъогур зэрэщызэпачы­гъэм къыхэкIыкIэ лъэсрыкIуи 141-мэ протоколхэр афызэхагъэуцуагъэх.

Автоинспекцием икъулыкъушIэхэр водительхэм къяджэ гъогум сакъыныгъэ къыщызхагъэфэнэу, гъогу­рыкIоным ишапхъэхэр амыукъонхэу. Джащ фэдэу лъэсрыкIохэм зафагъазэ амыгъэунэфыгъэ чIыпIэхэм гъогур ащызэпамычынэу, гъогум зэпырыкIыхэ хъумэ бгъуитIумкIи заплъыхьанэу.

Адыгеим иполицие зыфэжъугъаз

БзэджэшIагъэхэу ыкIи хъугъэ-шIагъэ­хэу гъогухэм, общественнэ чIыпIэхэм ащызэрахьэхэрэр анахьыбэрэмкIэ цIыфхэм янэрылъэгъух. БзэджэшIагъэ ыкIи административнэ хэбзэукъоныгъэ зэрахьагъэу шъущыгъуазэмэ бзэджашIэм итеплъэ гум ишъуубыт (иинагъэ, щыгъыным, цуакъэм, нэшанэу иIэхэм шъуалъыплъ). Полицием псынкIэу макъэ зэ­режъугъэIущтым шъупылъ, телефон номерэу 02-м (102-м) шъутеу, хэбзэукъоныгъэу нэрылъэгъу шъузы­фэхъугъэм щыжъугъэгъуазэх.

ШъумыгуIэу, нахь игъэкIотыгъэу хъугъэ-шIагъэу шъу­зэрихьылIагъэр, уахътэр, такъикъэу зыщыхъугъэр полицием икъулыкъушIэхэм къафэшъуIуатэх. БзэджашIэм итеплъэ зыфэдэр ыкIи ащ лъэныкъоу зыздигъэзагъэр къулыкъушIэхэм яшъуIомэ охътэ кIэкIым къыкIоцI ар къаубытын алъэкIыщт. Хъугъэ-шIагъэм ыпкъ къикIыкIэ зыгорэм шъобж тещагъэ хъумэ, ащ IэпыIэгъу шъуфэхъу. Полицием икъулыкъушIэхэр къэкIофэхэ шъуяж. БзэджэшIагъэ зэрахьэнэу агъэхьазырэу, бзэджашIэм зызщигъэбы­лъыгъэм, наркотикыр, Iашэр ыкIи къэорэ пкъыгъохэр къезыгъэкIокIыхэрэм якъэбар шъущыгъуазэмэ полицием ителефон номерэу 02-м (102-м) шъутеу.

Банкым иIофышIэхэу аIохэзэ…

«Ваша банковская карта забло­ки­рована», «Операция по карте приостановлена» ыкIи нэмыкIхэри зэрытхэгъэ СМС-хэр зэкъодзакIохэм цIыфхэм афагъэхьых е ятелефон номерхэмкIэ афытеох.

ТелефонымкIэ зафытеохэкIэ щынэгъончъэнымкIэ банкым икъулыкъу иIофышIэхэу араIох ыкIи банкым икартэу цIыфым ыгъэфедэрэм кIуачIэ имыIэжьэу макъэ арагъэIу. КъэIогъэн фае, бзэджашIэхэм анахьэу къызфагъэфедэхэрэр сбербанкым икартэхэр арых. Мы гумэкIыгъор дэгъэзыжьыгъэным фэшI картэм ыкIыб пчъэгъищ хъурэ кодэу тетхагъэр къараIон фаеу цIыфым макъэ рагъэIу. СМС шIыкIэм тет мэкъэгъэIур сбербанкым къыфыригъэхьыгъэу бэмэ къащэхъу ыкIи кодыр бзэджашIэхэм араIо. Нэужым цIыфым иахъщэу картэм илъыр зэкIэ гъэпцIагъэкIэ рахы. Мыщ фэдэ гумэкIыгъо шъухэмыфэным фэшI къы­шъуаIорэр зэкIэ шъушIошъ шъумыгъэхъу. Банкым къышъуитыгъэ картэм иреквизитхэр, ПИН-кодыр, па­ролыр, джащ фэдэу картэм ыкIыб тетхагъэхэ цифрэхэр, кодыр зыми ешъумыIох.

Банкыр хэтэу, организацие гори ПИН-кодым къыкIэдэун фитэп. Картэм игъусэу ПИН-кодыр шъуIыгъ ыкIи ПИН-кодыр картэм тешъутхэ хъущтэп. Ежь банкым ителефон номер шъыпкъэр картэм ыкIыб тетхагъ, арышъ, упчIэ горэ шъуиIэмэ шъуафытеон шъулъэкIыщт.

Миллиони 2 фэдиз ашIуатыгъугъ

ЖъоныгъуакIэм иапэрэ мэфипшIым телефон гъэпцIакIохэм Адыгеим щы­псэухэрэм сомэ миллионитIу ашIуатыгъугъ.

Мэфи 10-м къыкIоцI Iудзыгъэ шIыкIэм тетэу гъэп­цIэгъи 5 тиреспубликэ щызэрахьагъэу полицием ыгъэунэфыгъ. Ащ сомэ миллиони 2 зэрарэу фэхъугъ. Зэфэхьысыжьхэм къызэрагъэлъагъорэмкIэ, ахэм лъа­псэ афэхъугъэр зимылъку атыгъугъэхэм сакъыныгъэ къызэрэзыхамыгъафэрэр ары.

Мы хъугъэ-шIагъэм епхыгъэу илъэс 35-рэ зыныбжь хъулъфыгъэм идао АР-м хэгъэгу кIоцI IофхэмкIэ и Министерствэ къыIэкIэхьагъ. Ащ къызэриIотагъэмкIэ, финанс организацием иIофышIэу ыIозэ хъулъфыгъэм ителефон ымышIэрэ горэ къыфытеуагъ. Корпоративнэ номерхэм яхьщырэу 8-495…. ыкIи 8-499-кIэ къыригъажьэхэрэмкIэ ащ къыфытеуагъэх. Сакъыныгъэ къызыхимыгъафэу гъэпцIакIохэм цыхьэ афишIи, къы­раIорэр зэкIэ афигъэцэкIагъ. Нэужым ащ исчет илъыгъэ сомэ мин 320-р бзэджашIэм ритыгъукIыгъ.

Мы хъугъэ-шIагъэм ехьщырэу Мыекъуапэ щыщ бзылъфыгъэу илъэс 45-рэ зыныбжьым ахъщэ шIуатыгъугъ. Зэпыу ямыIэу гъэпцIакIохэр бзылъфыгъэм къыфытеуагъэх. Банкым иIофышIэхэу къыраIозэ бзылъфыгъэм ышIошъ агъэхъуи, икартэ тет пчъагъэхэр ариIуагъэх. Ащ ыуж сомэ мин 270-р икартэ рахыгъ.

Джащ фэдэу илъэс 55-рэ зыныбжь бзылъфыгъэм гъэпцIакIор къыфытеуи, ыпэкIэ Iэзэгъу уцэу къыщэфыгъэр нэпцIэу зэрэщытыгъэр къыриIуагъ ыкIи а гумэкIыгъор дагъэзыжьыным фэшI компенсацие къы­ратыжьынэу гуригъэIуагъ. Iофым ишъыпкъапIэ зэримыгъашIэу гъэпцIакIом икартэ сомэ мини 140-рэ бзылъфыгъэм фыригъэхьагъ.

Ащ нэмыкIэу Интернет-площадкэр къызфагъэфе­дэзэ, бзэджашIэхэм гъэпцIагъэхэр зэрахьэх. Илъэс 51-рэ зыныбжь хъулъфыгъэм къытыгъэ даом полицием икъулыкъушIэхэм Iоф дашIэзэ агъэунэфыгъ, биржэм ахъщэ хилъхьан ылъэкIынэу агъэгугъэзэ мэзэ заулэкIэ гъэпцIакIохэр къыфытеуагъэх. Нэужым хъулъфыгъэм иахъщэ бизнесым хилъхьан ылъэкIынэу гурагъаIуи, ащ исчет илъыгъэ сомэ мин 679-р къыраIогъэ номерым афыригъэхьагъ. Арэу щытми, иахъщэ федэ зыпари къыкIэкIуагъэп. БзэджашIэхэми загъэбылъыжьыгъ.

Адыгеим иполицие цIыфхэм къяджэ сакъыныгъэ къызхагъэфэнэу, амышIэрэ цIыфым цыхьэ фамы­шIынэу, бзэджашIэхэм, гъэпцIакIохэм защаухъумэнэу.

УФ-м хэгъэгу кIоцI IофхэмкIэ и Министерствэ и ГъэIорышIапIэу «К» зыфиIорэм макъэ къышъуегъэIу: шъуикартэ тетхэгъэ пчъагъэхэр, Пин-кодыр зыми ешъумыIу. Организациехэм, банкыр зэрахэтэу, Пин-­кодым иномер къыкIэупчIэнхэ фитхэп. Шъуикартэ ипIалъэ икIыгъэу къызышъуаIокIэ, шъушIошъ шъумыгъэхъоу, банкым шъутеуи къэбар шъыпкъэр зэжъугъашI. ЦIыфхэр бэу зыхэлэжьэхэрэ Iофтхьабзэхэм уазэращызекIон фаер:

— общественнэ рэхьатныгъэр уукъо хъущтэп;

— цIыфхэмкIэ щынагъоу ыкIи гузэжъогъоу щытхэ зекIуакIэхэр щыбгъэзыенхэ фае;

— Iофтхьабзэхэр зыщыкIохэрэ псэуалъэ­хэм ыкIи агъэфедэхэрэ пкъыгъохэм уафэсакъын фае;

— цIыфхэм ыкIи ахэм яфэIо-фашIэхэр зыгъэцакIэхэрэм, Iофтхьабзэм изэхэщакIо­хэм, пэщэ IэнатIэм Iутхэм, Iофтхьабзэм изэхэщэнкIэ общественнэ рэхьатныгъэр къэзыухъумэхэрэм шъхьэкIафэ афэшъу­шIын фае;

— Iофтхьабзэр зыщырекIокIырэ уахътэм машIор къэмыгъэхъугъэнымкIэ ыкIи рэ­хьатныгъэр къэухъумэгъэнымкIэ хэбзэу­хъумэкIо къулыкъухэм къышъуаIорэр ха­бзэм тетэу жъугъэцэкIэнэу щыт;

— зыныбжь имыкъугъэхэм алъыплъэн щымыIэу язакъоу къэшъумыгъанэх;

— хэушъхьафыкIыгъэ хэхыгъэ чIыпIэхэм шъуиавтомобильхэр жъугъэуцух;

— ошIэ-дэмышIэ Iоф къэхъоу цIыфхэр агъэкощынхэ фаеу хъумэ, хэгъэгу кIоцI къулыкъум иIофышIэ ыIорэм тетэу шъузе­кIонэу щыт, рэхьатныгъэ зыхэжъугъэлъ, егъэлыегъащэу щынэныгъэ къызхэжъугъа­фэ хъущтэп.

Адыгэ Республикэм ичIыпIэхэм цIыфхэр бэу зы­хэлэжьэхэрэ Iофтхьабзэхэр екIокIыхэ хъумэ, общест­веннэ рэхьатныгъэр къэухъумэгъэнымкIэ хэбзэукъоныгъэ зэрахьагъэу хъугъэ-шIагъэхэм шъуарихьылIагъэмэ, АР-м хэгъэгу кIоцI IофхэмкIэ и Министерствэ идежурнэ часть 02-кIэ (102) макъэ ежъугъэIун шъу­лъэкIыщт.

Къэзыгъэхьазырыгъэр КIАРЭ Фатим.