Тэхъутэмыкъое районым щыпсэурэ хъулъфыгъэм къэралыгъом игъунапкъэ зэпичын ыкIи IэкIыбым зыщи­гъэпсэфын амал иIэным апае хэбзэIахьхэмкIэ зэIуигъэкIэгъэ чIыфэр къыпщыныжьыгъ. ЗэкIэмкIи ащ сомэ мин 700-м ехъу къызэкIигъэкIо­жьыгъ.

Хьыкум приставхэм яотделэу мы муниципалитетым щыIэм тхьапэу къыIэкIэхьагъэм къыпкъырыкIызэ хьыкум пристав-гъэцэкIакIом Iоф къызэIуихыгъ. ЧIыфэ зытелъыр ащ щигъэгъозагъ ыкIи ар игъом къыпщынын зэрэфаер гуригъэIуагъ. Ипшъэрылъхэр зимыгъэцакIэкIэ чIыфэу телъым джыри проценти 7 зэрэхэхъощтыр риIуагъ.

Ау пIалъэу къыфагъэуцугъэм ехъулIэу хъулъфыгъэм чIыфэр къызэкIигъэкIожьыгъэп. Хьыкум приставым Iофыр зэхифызэ ыгъэунэфыгъ мыщ транспорт заулэ ыкIи чIыгу Iахьхэр тетхагъэхэу. Ащ къыпкъырыкIызэ ахэр охътэ гъэнэфагъэкIэ ыгъэфедэнхэ, джащ фэдэу къэралыгъом игъунапкъэ зэпичын фимытэу унашъо ышIыгъ.

Нэужым къызэрэнэфагъэмкIэ хъулъфыгъэр IэкIыбым кIонэу зигъэхьазырыщтыгъ. Ащ къыхэкIыкIэ чIыфэу телъыр зэкIэ къыпщыныгъ, ащкIэ Iофыр зэфэшIыжьыгъэ хъугъэ.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.