Кавказ заор заухыгъэр илъэси 157-рэ зэрэхъурэм фэгъэхьыгъэ шъыгъо-шIэжь зэхахьэхэр Адыгэ Республикэм жъоныгъуакIэм и 21-м щыкIощтых.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет Iофтхьабзэм изэхэщэкIо куп хэтхэр щызэIукIагъэх.

Комитетым итхьаматэу Шъхьэ­лэхъо Аскэр зэIукIэгъум зэрэщыхигъэунэфыкIыгъэу, шъыгъо-шIэжь мафэм хабзэм икъулыкъушIэхэр, республикэм иобщественнэ движениехэм ялIыкIохэр, культурэм иIофышIэхэр, лъэпкъ зэфэшъхьафхэм яныбжьыкIэхэр, нэмыкI­хэри хэлэжьэщтых.

Адыгэ Республикэм культурэмкIэ и Министерствэ, республикэм иобщественнэ движениеу «Адыгэ Хасэр», А. Шъхьэлахъор зипэщэ Комитетыр зэхэщэн Iофыгъохэм афэгъэзагъэх. Адыгэ Республикэм и Лъэпкъ театрэу Цэй Ибрахьимэ ыцIэ зыхьырэр культурэм епхыгъэ Iофыгъохэм нахь афэгъэзагъ. Концерт-реквиемыр ЗыкIыныгъэм­рэ ЗэгурыIоныгъэмрэ япчэгу щыкIощт.

ЗэхэщэкIо купым хэтхэу, Адыгэ Республикэм культурэмкIэ иминистрэ игуадзэу Кушъу Светла­нэ, республикэ общественнэ движениеу «Адыгэ Хасэм» итхьа­матэу ЛIымыщэкъо Рэмэзан, Адыгэ Хасэм игъэцэкIэкIо куп хэтэу Хъот Юныс, комитетым иIофышIэхэу Мурад ГощлъапIэ, Амур Рузанэ зэхахьэм къыщыгущыIагъэх.

Концерт-реквиемым ихудожественнэ Iофыгъохэм афэгъэзагъ Адыгэ Республикэм искусствэхэмкIэ изаслуженнэ IофышIэшхоу, Лъэпкъ театрэу И. Цэим ыцIэ зыхьырэм ихудожественнэ пащэ иIэнатIэ зыгъэцэкIэрэ Хьакъуй Аслъан. Ащ къыIуагъ шъыгъо- шIэжь мафэм анахьэу къыщыхагъэщмэ ашIоигъор.

— ШIэжьым имэхьанэ зы­къед­гъэIэтызэ, республикэм лъэпкъхэу исхэм языкIыныгъэ игъэпытэн тыпылъ, — къыIуагъ Хьакъуй Аслъан.

Къэрэмыхъужь ащ фэдэ лъэпкъ лъэпсэич зао. ЦIыфым ипIун, тарихъым, тищыIакIэ нахьышIу шIыгъэным афэгъэхьыгъэ зэхахьэр жъоныгъуакIэм и 21-м, пчыхьэм сыхьатыр 5-м филармонием дэжь щырагъэжьэщт.