УФ-м и Президентэу Владимир Путиным УФ-м и Федеральнэ ЗэIукIэ фэгъэзэгъэ Джэпсалъэу мэлылъфэгъу мазэм къышIыгъэм илъэсэу тызыхэтым ыкIэм нэс IофшIэпIэ чIыпIэхэм ябэдзэршIыпIэ зэтыригъэуцожьынэу Правительствэм пшъэрылъ къыщыфишIыгъ.

БлэкIыгъэ илъэсым зэпахырэ узэу дунаир зэлъызыкIугъэм ыпкъ къикIэу гъунапкъэхэр зиIэ режимым шъолъырхэр зыте­хьэхэм, экономикэр зэтемызыным, бизнес цIыкIум ыкIи гурытым ащылажьэхэрэм чIэнэгъэшхохэр амышIынхэм, цIыф­хэм яIофшIапIэхэр къызэтенэнхэм афытегъэпсыхьагъэу къэралыгъом макIэп ышIагъэр. ФэгъэкIотэнхэр къыздэлъытэгъэ кредитхэм афэгъэхьыгъэ программэм ишIуагъэкIэ IофшIэпIэ чIыпIэ миллионитф фэдиз къэгъэнэжьыгъэ хъугъэ. Арэу щытми, зыпарэми IофшIапIэр чIимынэнэу хъугъэп.

Джырэблагъэ къэралыгъом ипащэ тхьамэтагъор зыщызэри­хьэгъэ зэхэсыгъоу УФ-м и Пра­вительствэ иIагъэми анахь шъхьа­Iэу зигугъу щашIыгъэхэм ар ащыщ. Iофхэр зынагъэсыгъэ­хэм щи­гъэгъозэнхэу Владимир Путиным IофшIэнымкIэ ыкIи цIыфхэр социальнэу къэухъумэгъэнхэмкIэ министрэм зыфи­гъэзагъ.

Антон Котяковым къызэриIуа­гъэмкIэ, Президентым унашъоу къышIыгъэм тетэу IофшIэпIэ чIыпIэ зиIэхэм япчъагъэ пандеми­ем ыпэкIэ зэрэщытыгъэм кIагъэ­хьажьыным пае джыри нэбгырэ миллион фэдизмэ ащкIэ IэпыIэгъу афэхъунхэ фае. Урысыем ишъолъыр 17-мэ зэпахырэ узыр къежьэным ыпэкIэ пчъагъэу яIа­гъэхэм акIагъэхьажьыгъ, плIы- мэ Iофхэр джыри ащыхьылъэх.

Президентым Джэпсалъэм къызэрэщиIуагъэм тетэу, предпринимателэу цIыфхэр IофшIапIэм IузымыгъэкIыхэрэм е зыштэхэрэм къэралыгъом IэпыIэгъу ритыным фэгъэхьыгъэ программэр лъагъэкIуатэ. Ащ нэмыкIэуи бизнес цIыкIум ыкIи гурытым ащылажьэхэрэм IэпыIэгъу ятыгъэным фытегъэ­псыхьэгъэ предложениехэр къагъэхьазырынхэу къэралы­гъом ипащэ къафигъэпытагъ.