Федеральнэ программэу «Детство без опасности» зыфиIорэм ипхырыщын Адыгеим щырагъэжьагъ.

Ащ фэгъэхьыгъэ пресс-зэIукIэ Мыекъопэ къэлэ клиническэ сымэджэщым иперинатальнэ гупчэ щыкIуагъ. Федеральнэ проектэу «Гъогу щынэгъончъэ­хэр ыкIи шэпхъэшIухэм ади­штэхэрэр» зыфиIорэм мы программэр къыдыхэлъытагъ.

Iофтхьабзэм хэлэжьагъэх АР-м и Премьер-министрэу Геннадий Митрофановыр, псауныгъэр къэухъумэгъэнымкIэ министрэу Мэрэтыкъо Рустем, гъогурыкIоныр щынэгъончъэнымкIэ Адыгеим и Къэралыгъо автоинспекцие ипащэ игуадзэу Гусэрыкъо Рамзин, кIэлэцыкIу­хэм яфитыныгъэхэр къэухъумэгъэнхэмкIэ уполномоченнэу Александр Ивашиныр, федеральнэ проектэу «Детство без опасности» зыфиIорэм ипащэу Кристина Ляпистовар.

Адыгэ Республикэм и Премьер-министрэ къызэриIуагъэмкIэ, гъогурыкIоныр щынэгъончъэным ылъэныкъокIэ респуб­ликэм ипащэхэм анахьэу янэплъэгъу итхэм ащыщ кIэлэцIыкIухэр зыхэфэрэ гъогу хъугъэ- шIагъэхэр къэмыгъэхъугъэнхэр.

Гусэрыкъо Рамзин ипсалъэ къызэрэщыхигъэщыгъэмкIэ, республикэм кIэлэцIыкIу гъогу- транспорт фыкъоныгъэхэм япчъагъэ аужырэ илъэситIум нахь макIэ щыхъоу фежьагъ. Къэ­ралыгъо автоинспекцием ипащэ игуадзэ зэрэхигъэунэ­фыкIыгъэм­кIэ, гъогу фыкъоныгъэхэр нахь макIэ шIыгъэнымкIэ АР-м ихэбзэ къулыкъу иIэпыIэгъоу инспекцием зэрихьэрэ IофшIэным ишIуагъэ къызэрэкIощтым ицыхьэ телъ.

ГущыIэр лъигъэкIотагъ министрэу Мэрэтыкъо Рустем. КIэ­лэцIыкIу гъогу-транспорт фыкъо­ныгъэхэм япхыгъэ Iофыгъор ведомствэ пстэуми аIэ зэкIэ­дзагъэу зэрэзэшIуахырэр ащ къыIуагъ. Джащ фэдэу проектыр республикэм щыпхыращынымкIэ ищыкIэгъэ IэпыIэгъур псауныгъэр къэухъумэгъэнымкIэ Министерствэм къызэраритыщтыр Мэрэтыкъо Рустем къыхигъэщыгъ.

Пресс-зэIукIэм къыщыгущыIэгъэ пстэуми кIэлэцIыкIухэр автомобилькIэ зэрэзэращэщт шIыкIэхэм ны-тыхэм хэшIыкI афыряIэнымкIэ, щынагъоу ащ къыхэкIыхэрэр икъоу къагурыIонымкIэ мы проектым мэхьанэ зэриIэр хагъэунэфыкIыгъ.

Пшъэрылъ шъхьаIэр — кIэлэцIыкIу гъогу-транспорт хъу­гъэ-шIагъэхэр щыгъэзыегъэнхэмкIэ сабыйхэр къызыщыхъу­хэрэ унэхэм ыкIи перинатальнэ гупчэхэм зэпымыоу Iоф зы­шIэщт системэ зыкI ащы­гъэпсыгъэныр.

«Детство без опасности» зыфиIорэр тишъолъыр едзы­гъуищэу щыкIощт: апэрэр — егъэжьэгъур ыкIи мы Iофыгъом общественностым ынаIэ тыридзэныр; ятIонэрэр – ны хъугъэ­хэм егъэджэн сыхьатхэр языгъэхьыщт медицинэ IофышIэхэр гъэхьазырыгъэнхэр, ящэнэрэр — тренингхэр тхьамафэм зытIо-зыщэ зэхащэнхэр.

Мы уахътэм ехъулIэу перинатальнэ гупчэм егъэджэн сыхьатхэр зыщыкIощт унэр щагъэхьазырыгъ, ащ чIэтыщт ищыкIэгъэ оборудованиер къащагъ.

Iэшъынэ Сусан.