Коронавирусым пэуцужьырэ вакцинэм ихэлъхьан епхыгъэ Iофтхьабзэр Урысыем ишъолъыр пстэуми ащэкIо.

ЖъоныгъуакIэм и 15-м къы­т­IэкIэхьэгъэ къэбархэм къызэрагъэлъагъорэмкIэ, зэрэ Урысыеу вакцинэ 24 009 252-рэ ахалъхьагъ, ащ иIахьитIу нэбгырэ 9 677 252-мэ афа­шIыгъ.

Адыгеир тштэмэ, нэбгырэ 22 943-мэ вакцинэм изы Iахь ахалъхьагъ, нэбгырэ 15 500-м вакцинациер икъоу акIугъ, пстэумкIи прививкэ 38 443-рэ афашIыгъ.

COVID-19-м пэуцужьырэ вакцинэм ихэлъхьан епхыгъэ Iофтхьабзэм хэлажьэхэ зышIоигъохэу Мыекъуапэ щыпсэу­хэрэм апае мобильнэ пунктыр Лениным ыцIэ зыхьырэ Гупчэм жъоныгъуакIэм и 17 – 20-м Iоф щишIэщт.

Мы чIыпIэм тыгъуасэ тыщы­Iагъ ыкIи терапевтэу Кристина Шевченкэм гущыIэгъу тыфэ­хъугъ. Ащ къызэриIуагъэмкIэ, мафэм нэбгырэ 20 — 30-мэ вакцинэр ахалъхьэ. Жъоныгъуа­кIэм и 17-м сыхьатитIум къыкIоцI нэбгыри 9-мэ вакцинациер акIугъэу тырихьылIагъ. Нахьыбэу хэгъэгу кIоцI IофхэмкIэ Министерствэм къулыкъу щызы­хьыхэрэр ыкIи пенсионерхэр ары къакIохэрэр.

Джащ фэдэу къэлэдэс­хэм вакцинэр щарагъэшIын алъэкIыщт Мые­къопэ къэлэ поликлиники 5-у мы адресхэм атетхэм: къ. Мыекъуапэ, ур. Комсомольскэр, 159, Чкаловым иур., 77, я 7-рэ переулкэр, 16, Жуковскэм иур., 18, ст. Ханскэр, Верещагиным иур., 111.

ШIоигъоныгъэ зиIэ пстэуми вакцинэр зыхарагъэлъхьан алъэ­кIыщт, ащ пае паспортыр ыкIи СНИЛС-р ищыкIагъэх.

Шъугу къэдгъэкIыжьын, эпидемиологием изытет нахьышIу хъугъэ нахь мышIэми, коронавирусыр къытпыхьаным ищынагъо джыри къытшъхьарыт. Iофыгъом ихэкIыпIэр – иммунитет тиIэныр ары. Вакцинэр зыхябгъалъхьэмэ, ар уиIэщт. Шъуипса­уныгъэ шъуфэсакъ!

Iэшъынэ Сусан.