Адыгеим и ЛIышъхьэу КъумпIыл Мурат Урысыем ФедерациемкIэ и Совет регламентымкIэ, парламент IофшIэным изэхэщэнкIэ и Комитет итхьаматэу, Урысыем ищэфакIохэм яобъединение и Гупчэ совет итхьаматэу Вячеслав Тимченкэм республикэм и Правительствэ зычIэт унэм тыгъуасэ зэIукIэгъу щыдыриIагъ.

Адыгэ Республикэм ищэфа­кIохэм яфитыныгъэ нахьышIоу къэухъумэгъэным тегъэпсыхьэгъэ зегъэушъомбгъугъэ зэхэсыгъоу тыгъуасэ Адыгеим щы­кIуагъэм къыдыхэлъытагъэу рес­публикэм ипащэ сенаторым IукIагъ. МКъТУ-м щызэхащэгъэ Iофтхьабзэм хэлэжьагъэх АР-м иминистрэхэм я Кабинет хэтхэр, АР-м и Къэралыгъо Совет —Хасэм идепутатхэр, Роспотребнадзорым АР-мкIэ и ГъэIорышIапIэ ипащэхэр, Урысыем ищэфакIохэм яобъединениерэ ащ ишъолъыр къутамэхэмрэ ахэтхэр, АР-м и Общественнэ палатэрэ хабзэм имуниципальнэ къулыкъухэмрэ ялIыкIохэр.

КъумпIыл Мурат зэрэхигъэу­нэфыкIыгъэмкIэ, УФ-м исенатор зыхэлэжьэрэ зэхэсыгъом Адыге­имрэ Урысыем ФедерациемкIэ и Советрэ бэшIагъэу зэдыряIэ хъугъэ зэдэлэжьэныгъэр лъи­гъэкIотэщт.

«Урысыем ФедерациемкIэ и Совет и Тхьаматэу Валентина Матвиенкэмрэ шъолъырхэм я Палатэхэмрэ яшIуагъэкIэ со­циальнэ, инфраструктурэ Iофыгъуабэхэр зэшIохыгъэ мэхъу. Адыгеим ыцIэкIэ сенаторхэу Олег Селезневымрэ Хъопсэрыкъо Муратрэ ащ фэдэ Iофым чанэу хэлажьэх. Федерацием-кIэ Советым ипарламент комитетхэм язэхэсыгъохэр мызэу­-мытIоу республикэм щызэхащагъэх. ЩэфакIохэм яфитыныгъэ­хэр нахьышIоу къэухъумэгъэнхэм тегъэпсыхьэгъэ зэхэсыгъоу непэ Адыгеим щыкIорэм рес­публикэм исхэм ящыIэкIэ-псэу­кIэ зыкъегъэIэтыгъэным епхыгъэ Iофыгъохэм зэрэщыхэплъэщт­хэм сицыхьэ телъ», — къыIуагъ КъумпIыл Мурат.

Вячеслав Тимченкэм зэрэхигъэунэфыкIыгъэмкIэ, сенаторхэм яIофшIэнкIэ анахьэу анаIэ зытырагъэтырэр хэгъэгум ипащэ къыгъэнэфэгъэ лъэны­къохэр ары.

«ЦIыфхэм яфедэхэр къыдамылъытэу джырэ шапхъэхэм адиштэрэ обществэ агъэпсын алъэкIыщтэп. Ащ фэгъэхьыгъэу Урысыем и Президентэу Владимир Путиным мызэу-мытIоу къыIуагъ. ЦIыфхэм яфитыныгъэхэм якъэухъумэн тиобществэ анахьэу зыгъэгумэкIырэ Iофыгъохэм ащыщ», — къыIуагъ сенаторым.

ЧIыпIэхэм товархэр къащыдэзгъэкIхэрэм IэпыIэгъу ягъэгъотыгъэнымкIэ, шъолъырхэр зэрыгушхорэ продукциехэм якъэухъумэнкIэ Адыгеим опытышIу зэриIэр Вячеслав Тимченкэм зэIукIэгъум щыхигъэу­нэфыкIыгъ.

КъумпIыл Мурат зэIукIэгъум къызэрэщиIуагъэмкIэ, ФедерациемкIэ Советым и Тхьаматэу Валентина Матвиенкэм шъолъырхэм IэпыIэгъу къызэраритырэм ишIуагъэкIэ адыгэ къуаем итамыгъэ республикэм къыу­хъумэн ылъэкIыгъ.

ЗэIукIэгъум хэлэжьагъэхэр Урысыем и Правительствэ, УФ-м ФедерациемкIэ и Совет, шъолъырхэм яхабзэ изаконо­дательнэ къулыкъухэр зыхэлэ­жьэщтхэ нэмыкI лъэныкъохэми атегущыIагъэх.

Адыгэ Республикэм и ЛIышъхьэ ипресс-къулыкъу