БлэкIыгъэ 2020-рэ илъэсым ибюджет гъэцэкIагъэ зэрэхъугъэм фэгъэ­хьыгъагъ «публичнэ едэIунхэу» АР-м и Правительствэ зычIэт Унэм ты­гъуасэ щызэхащэгъагъэхэр. АР-м и Премьер-министрэ игуадзэу Са­пый Вячеслав ащ тхьамэтагъор щызэрихьагъ.

Iофтхьабзэм АР-м и Къэ­ралыгъо Совет — Хасэм и Тхьаматэ игуадзэу Iэщэ Мухьамэд, Парламентым идепутатхэм ащыщхэр, муниципальнэ образованиехэм, къулыкъу ыкIи ведомствэ зэфэшъхьафхэм, общественнэ организациехэм ялIыкIохэр, студентхэр, нэмыкI­хэр хэлэжьагъэх.

Сапый Вячеслав ипэублэ псалъэ «едэIунхэр» бюджет политикэм къыщыдэлъытэгъэ Iофтхьабзэу, шIокI имыIэу гъэцэкIэгъэн фаехэм зэращыщыр къыщыхигъэщыгъ.

— Республикэм щыпсэухэрэм бюджет ахъщэр зыдакIорэр, зыпэIухьэрэр ашIэнэу фитыныгъэ яI, — къыIуагъ Премь­ер-министрэм игуадзэ. — «Пуб­личнэ едэIунхэм» ащ фэдэ амал къаты. Бюджет мылъкур гъэ­федагъэ зэрэхъугъэр цIыфхэм алъыгъэIэсыгъэныр Урысыем исубъектхэм зэрагъэцакIэрэр икIыгъэ илъэсым зызэрагъа­п­шэм, анахь шъхьаихыгъэу, зэ­Iу­хыгъэу, зытетым тетэу ар къэ­зыгъэлъагъохэрэм Адыгеир ащыщ хъугъэ. «ЕдэIунхэмкIэ» бюджет ахъщэр зыдэкIуагъэр зэралъыдгъэIэсырэм имызакъоу, республикэм иинтернет нэкIубгъо шъхьаIи, финансхэмкIэ Министерствэм инэкIубгъуи къарэхьэ. ШIоигъоныгъэ зиIэ пстэури ахэм ахэплъэнхэ, яшIошI­хэр къыраIотыкIынхэ алъэ­­кIыщт.

АР-м финансхэмкIэ иминист­рэу Виктор Орловыр 2020-рэ илъэсым бюджетыр гъэцэкIагъэ зэрэхъугъэм къытегущыIагъ. Зэхэт бюдже­тыр хахъохэмкIэ сомэ миллиард 35-рэ миллион 309,2-рэ хъу­щтыгъ. Ар ыпэрэ 2019-рэ илъэсым егъэпшагъэмэ, процент 25-кIэ нахьыб. Хъарджхэри нахьы­багъэх, сомэ миллиард 36-рэ миллиони 98-рэ хъущтыгъэу ары министрэм къызэри­Iуагъэр.

Республикэм ибюджет пштэ­мэ, хахъохэмкIэ ар сомэ мил­ли­ард 31-рэ миллион 204-рэ зэ­рэхъущтыгъэр, ари процент 28­-кIэ нахьыб. Хъарджхэр сомэ миллиард 31-рэ миллион 904-рэ хъущтыгъэх. ХэбзэIахьэу ыкIи мыхэбзэIахьэу ащ къыхэлъхьагъэ хъугъэр сомэ миллиарди 10-рэ миллион 800-рэ, зымыгъэ­зэжьыщт мылъкоу къыхэхъуагъэр сомэ миллиард 24-рэ мил­лион 595,3-рэ мэхъу.

Бюджетым инахьыбэр, ар процент 62,3-рэ мэхъу, социаль­нэ лъэныкъом кIуагъэ. Минист­рэм къызэриIуагъэмкIэ, социаль­нэ политикэм къыщыдэлъытагъэхэм ягъэцэкIэн сомэ мил­лиарди 7-рэ миллиони 187,6-рэ пэIухьагъ, гъэсэныгъэм ылъэны­къокIэ сомэ миллиарди 5-рэ миллион 529,1-р агъэкIуагъ, псауныгъэм икъэухъумэн рес­публикэ бюджетым щыщэу пэ­Iухьагъэр сомэ миллиарди 3-рэ миллион 955,1-рэ мэхъу.

Доклад ужым зэхэсыгъом хэлажьэхэрэм ащыщхэм упчIэ­хэр къатыгъэх. ПсэупIэ койхэм щыкIагъэу яIэхэр дэгъэзыжьыгъэнхэм, ахэр зэтегъэпсыхьэгъэнхэм алъэныкъокIэ цIыфэу адэсхэм шIоигъоныгъэу яIэхэр къызщагъэнэфэгъэ проектэу къагъэхьазырыхэрэм япхырыщын ары нахьыбэу ахэр зыфэгъэхьыгъагъэхэр.

ХЪУТ Нэфсэт.