УФ-м и Президентэу Владимир Путиным Та­тарстан икъэлэ шъхьаIэу Казань къыщыхъугъэ тхьамыкIагъом фэгъэхьыгъэ зэхэсыгъоу зэхи­щэ­гъагъэм гъэсэныгъэм иучреждениехэм ящы­нэгъончъагъэ, Iашэм игъэзекIон алъэныкъокIэ пшъэрылъ гъэнэфагъэхэр къыщишIыгъэх.

Гъэсэныгъэм епхыгъэ псэуа­лъэхэр терроризмэм щыухъу­мэгъэнхэм ылъэныкъокIэ щыкIагъэу щыIэхэр Казань къыщыхъугъэ тхьамыкIагъом къызэригъэнэфагъэхэм къыкIигъэт­хъызэ, ахэр дэгъэзыжьыгъэнхэм фытегъэпсыхьэгъэ предложениехэр охътэ благъэм къагъэхьазырынхэу къариIуагъ.

— ЕджапIэхэм ящынэгъон­чъагъэ зэрэщытэу пштэмэ, си­с­темэ горэ щыI, ау мы лъэ­ны­къомкIэ шIэгъэн фаехэм яна­хьыбэр шъолъыр пащэхэмрэ ежь еджапIэхэмрэ апшъэ илъхьагъэ хъугъэ. ЗэкIэ къэралыгъом зэрэщытэу зы екIолIэкIэ гъэнэфагъэ иIэн фае, — къы­Iуагъ Президентым ыкIи мы Iофым сыдигъокIи анаIэ тырагъэтынэу къафигъэпытагъ.

Iашэм игъэзекIони нахь гъэлъэшыгъэу лъыплъэнхэу, ар къыщэфыгъэу зиунэ щызыIы­гъ­хэми анаIэ атырагъэтынэу, хэ­зыгъэ имыIэу зэкIэри ауплъэ­кIунхэу Владимир Путиным пшъэрылъ къышIыгъ.

— Мыщи пхъэшагъэ хэлъэу шъукъекIолIэн фае, — къыIуагъ къэралыгъом ипащэ. — ЦIыфым Iашэ къыщэфынэу фи­тыныгъэ къэзытыхэрэм яIоф­шIэни джащ фэдэу пхъашэу уплъэкIугъэн фае. Ипсауныгъэ изытети амыуплъэкIоу, ахъщэ къаратымэ ищыкIэгъэ тхьапэр къатхэу зэрэщытыр дэгъэзы­жьыгъэныр шIокI зимыIэ Iоф. Ащ фэдэ щыIэ хъухэщтэп.