Казань тыдэшъыгъо
Республикэу Татарстан икъэлэ шъхьаIэу Казань тхьамыкIагъоу къыщыхъугъэм хэкIодагъэхэм яшIэжь пай Зэкъошныгъэм игупчэу Мыекъуапэ дэтым тет саугъэтым дэжь мемориал щагъэпсыгъ.
Адыгеим икъэлэ шъхьаIэ щыпсэухэрэм мэфитIу хъугъэу ащ къэгъагъэхэр, джэгуалъэхэр къырахьылIэх.
Тыгъуасэ АР-м и ЛIышъхьэу КъумпIыл Мурат министрэхэм я Кабинет хэтхэр, Къэралыгъо Советым —Хасэм идепутатхэр игъусэхэу ащ щыIагъ, къэгъагъэхэр кIэралъхьагъэх. Джащ фэдэу Iофтхьабзэм ныбжьыкIэ организациехэм ялIыкIохэр, кIэлэеджакIохэр, къэлэдэсхэм ащыщыбэхэр хэлэжьагъэх.
Шъугу къэдгъэкIыжьын, жъоныгъуакIэм и 11-м Казань щыщ хъулъфыгъэу илъэс 19 зыныбжьыр Iашэ ыкIи къаорэ пкъыгъохэр ыIыгъхэу къалэм ия 175-рэ гимназие чIэхьагъ. Я 8-рэ классым ис кIэлэеджакIохэу нэбгыри 7 ыкIи кIэлэегъаджэу чIэтхэм ащыщэу тIу ащ ыукIыгъэх. Пкъыгъоу къыгъэуагъэхэм, кIэлэцIыкIухэр щтагъэхэу шъхьаныгъупчъэхэм къызэрарыпкIыщтыгъэхэм апкъ къикIэу шъобж зэфэшъхьафхэр атещагъэхэу ыкIи бзэджашIэм ыуIагъэхэу пстэумкIи нэбгырэ 23-рэ сымэджэщхэм ачIэлъ. Ахэм хьылъэ дэдэхэр ахэтых.
ХЪУТ Нэфсэт.