АР-м иминистрэхэм я Кабинет изэхэсыгъоу Адыгеим и ЛIышъхьэу КъумпIыл Мурат тхьамэтагъор зыщызэрихьагъэр АР-м и Пра­ви­тельствэ зычIэт унэм тыгъуасэ щыкIуагъ. Зэхэсыгъом ипэублэ Ка­зань къыщыхъугъэ тхьамыкIагъом хэкIодагъэхэм зы такъикърэ афэ­шъыгъуагъэх.

Адыгеим щыпсэухэрэм ацIэкIэ АР-м и ЛIышъхьэ тхьамыкIа­гъом хэкIодагъэхэм ягупсэхэмрэ яIахьылхэмрэ афэтхьаусыхагъ, гъэсэныгъэ языгъэгъотырэ кIэлэцIыкIу организациехэм ящынэгъончъагъэ гъунэ зэрэлъафырэр республикэм щагъэлэшынэу пшъэрылъ афи­шIыгъ.

АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур зэхэсыгъом къызэрэщиIуагъэмкIэ, гурыт еджапIэ­хэмрэ кIэлэцIыкIу IыгъыпIэхэмрэ унэшъо гъэнэфагъэхэр аIэкIагъэхьагъэх. Гъэсэныгъэ зыщарагъэгъотырэ псэолъэ 322-мэ террористическэ актхэр ащызэ­рамыхьанхэмкIэ амалхэр ащагъэлъэшыгъэх.

ЕтIанэ лъэпкъ проектхэр зэ­рэпхыращхэрэм, республикэм хэхъоныгъэ зэришIыщт унэе про­граммэмрэ республикэ бюджетымрэ зэрагъэцакIэхэрэм атегущыIагъэх.

Транспорт, мылъку хьакъулахьхэм яугъоинкIэ IофшIэныр агъэлъэшынэу, бюджетым исатырэ пэпчъ, проектхэмкIэ къафатIупщын алъэкIыщт мылъкур зэхафынэу Адыгеим и ЛIышъхьэ пшъэрылъ афишIыгъ. Шъолъыр бюджетхэм ячIыфэхэр реструктуризацие шIыгъэнхэу УФ-м и Президент и Джэпсалъэ къызэ­рэщиIуагъэри, инфраструктурэ займхэм ягъэфедэнкIэ амалэу щыIэхэри мыщ дэжьым къыдэлъытэгъэнхэ фае.

УФ-м и Президентэу Вла­димир Путиным и Джэпсалъэ къы­щигъэнэфэгъэ пшъэрылъхэр зэрагъэцакIэрэм лъэшэу гъунэ зэрэлъафын фаем КъумпIыл Мурат анаIэ тыраригъэдзагъ. Ащ пае республикэм ипащэ куп гъэнэфагъэ зэхащэнэу пшъэ­рылъ афишIыгъ. Мы лъэны­къом­кIэ Iоф зэрашIэрэм пхъа­шэу гъунэ лъафынэу КъумпIыл Му­рат афигъэпытагъ.

Коронавирусым зэрэпэуцу­жьыщтхэм епхыгъэ Iофыгъохэми шъхьафэу зэхэсыгъом щахэп­лъагъэх. КъумпIыл Мурат пшъэ­рылъ афишIыгъ тестхэм якIункIэ, цIыфхэм вакцинэр зыхарагъэлъ­хьанымкIэ Iофхэр нахь агъэлъэ­шынэу, зыныбжь хэкIота­гъэхэри, зыныбжь илъэс 65-м ехъугъэу Iоф зышIэхэрэри ахэм къахара­гъэубытэнэу. Джащ фэ­дэу кIэлэ­цIыкIухэм япсауныгъэ гъэпытэгъэным тегъэпсыхьэгъэ Iофтхьа­бзэхэр зыщызэрахьэрэ лъэхъа­ным коронавирусым зыкъимы­штэнымкIэ ищыкIэгъэ амал­хэр зэрахьанхэу пшъэрылъ афишIыгъ.

АР-м социальнэ страхованиемкIэ и Фонд ипащэу Натхъо Разыет зэхэсыгъом къызэрэщиIуагъэмкIэ, фэгъэкIотэныгъэ зиIэ цIыфхэм санаториехэмрэ курортхэмрэ къащяIэзэнхэмкIэ Iофхэр мыгъэ зыпкъ рагъэуцо­жьыгъэх. Сэкъатыныгъэ зиIэхэм ящыкIэгъэ техническэ амалхэр арагъэгъотых. COVID-19-р къы­зэузыгъэ медицинэ IофышIэ 1783-мэ ахъщэ аратыгъ. Коронавирусыр къызэуталIэхэрэм яIэзэрэ медицинэ IофышIэ 1326-ми ахъщэ тедзэ къараты.

КъумпIыл Мурат зэхэсыгъом къызэрэщиIуагъэмкIэ, культурэм ипсэуалъэхэм якинозалхэр джы­рэ шапхъэхэм адиштэу оборудо­ваниекIэ зэтырагъэпсыхьанхэ, интерактивнэ Iофтхьабзэхэр зэ­рахьанхэ фае. Адыгеим и ЛIышъхьэ Джэджэ районым ит модельнэ тхылъеджапIэр ащкIэ щысэу къы­хьыгъ.

Адыгеим и ЛIышъхьэ турист­къэбарлъыгъэIэс, этнографи­ческэ гупчэхэу станицэу Да­хъомрэ федеральнэ гъогоу М4-«Дон» зыфиIорэмрэ адэжь щагъэпсыщтхэм япроектхэм ягъэцэкIэн мэхьанэшхо зэриIэр къыхигъэщыгъ.

Адыгеим и ЛIышъхьэ экономикэмкIэ, гъэтхэ губгъо Iоф­шIэнхэм язэхэщэнкIэ, инвес­тициехэр къахалъхьанхэмкIэ, «Рос­сети», ЖКХ-м зэхъокIыныгъэ фэшIыгъэным фэIорышIэрэ Фондым, нэмыкI къэралыгъо корпорациехэм адашIыгъэ зэзэгъыныгъэхэм къадыхэлъытэгъэ проектхэм ягъэцэкIэнкIэ пшъэрылъ заули зэ­хэсыгъом ща­фишIыгъ.

АР-м и ЛIышъхьэ ипресс-къулыкъу