Пшъэрылъхэр зэрагъэцакIэрэр ыуплъэкIугъ
Адыгеим и ЛIышъхьэ Адыгэ Республикэм икъэралыгъо бюджет учреждениеу «Къэралыгъо, муниципальнэ фэIо-фашIэхэр зыгъэцэкIэрэ Гупчэу» (МФЦ) Мыекъуапэ дэтым щыIагъ.
Урысые Федерацием и Президентэу Владимир Путиным къэралыгъо фэIо-фашIэхэр нахьышIоу афызэхащэнэу къафишIыгъэ пшъэрылъыр зэрагъэцакIэрэр КъумпIыл Мурат ыуплъэкIугъ, зэпахырэ узым зыкъызиштэгъэ лъэхъаным МФЦ-м Iоф зэришIагъэм уасэ къыфишIыгъ.
Шъугу къэтэгъэкIыжьы пандемием ыпкъ къикIыкIэ МФЦ-м рагъэблэгъэнхэм пае цIыфхэм гъэрекIо пэшIорыгъэшъэу зызэрэрагъэтхыщтыгъэр. ПстэумкIи нэбгырэ 402757-мэ 2020-рэ илъэсым МФЦ-хэм зафагъэзагъ.
АР-м IофшIэнымрэ социальнэ хэхъоныгъэмрэкIэ иминистрэ къызэриIуагъэмкIэ, Гупчэр ыпэкIэ Iоф зэришIэщтыгъэ шапхъэхэм тIэкIу-тIэкIузэ джыдэдэм атехьажьы. Ау цIыфхэр чэзыухэм ахэмытынхэм пае джыри пэшIорыгъэшъэу зарагъэтхын алъэкIыщт.
Гупчэм зы мафэм къыкIоцI нэбгырэ 250-мэ яфэIо-фашIэхэр афегъэцакIэ. ГъэрекIо цIыфхэр такъикъи 5 нахьыбэрэ чэзыум хэтыгъэхэп.
УФ-м и Президент кIэщакIо зыфэхъугъэ ахъщэ IэпыIэгъукIэхэм ятынкIэ Iофхэр зэрэкIорэр Адыгеим и ЛIышъхьэ зэригъэшIагъ.
«Хэгъэгум и Президент и Джэпсалъэ къыщыхигъэщыгъ къэралыгъо, муниципальнэ фэIо-фашIэхэр цIыфхэм нахьышIоу афагъэцэкIэнхэм мэхьанэшхо зэриIэр. МЦФ-хэр цIыфхэм ящыкIэгъэ дэдэх. Ащ фэдэ Гупчэхэм яIофшIэн нахьышIоу зэрэзэхащэщтым тыпылъын, тиреспубликэ исхэм апае технологическэ амалэу щыIэхэр зэкIэ дгъэфедэнхэ фае», —къыIуагъ КъумпIыл Мурат.