Адыгеим и ЛIышъхьэу КъумпIыл Мурат республикэм игъэцэкIэкIо ыкIи ихэбзэгъэуцу къулыкъухэм япащэхэр игъусэхэу Хэгъэгу зэошхом хэкIодагъэхэм ягупчэ саугъэт екIолIагъэх. Ащ къэгъагъэхэр ыкIи блэрхэр кIэралъхьагъэх.

Тикъэралыгъо къэзыухъумэгъэ дзэкIолIхэм яшIэжь агъэ­лъа­пIэзэ шъхьащэ афашIыгъ, зы такъикърэ афэшъыгъуагъэх.

ЛIыхъужъныгъэу зэрахьагъэр тщыгъупшэщтэп

МэфэкIым фэгъэхьыгъэ зэхахьэу АР-м и Къэралыгъо филармоние щыкIуагъэм цIыфыбэ зэрищэлIагъ.

Республикэм ипащэ къэзэ­рэугъоигъэхэм закъыфигъазэзэ ТекIоныгъэшхом и МафэкIэ къафэгушIуагъ, мы мэфэкIыр анахь лъапIэу, тицIыфхэм лIы­хъужъныгъэу зэрахьагъэм, заом илъэхъан ахэм зэгурыIоныгъэу азыфагу илъыгъэм ятамыгъэу зэрэщытыр хигъэунэфыкIыгъ.

— Урысыем и Президентэу Владимир Путиным къызэрэ­хигъэщыгъэу, советскэ дзэкIолI­хэм ыкIи тылым Iоф щызышIагъэхэм къэралыгъом фашIагъэр осэнчъ. Ахэм хэгъэгур къагъэ­нэжьыгъ, мамырныгъэр къау­хъумагъ, къалэхэр ыкIи къуа­джэхэр зэтырагъэуцожьыгъэх, — къыIуагъ КъумпIыл Мурат. Республикэм итворческэ купхэм къагъэхьазырыгъэ концертымкIэ мэфэкI зэхахьэр зэ­фашIыжьыгъ.

Тын лъапIэхэр афагъэшъошагъэх

ТекIоныгъэм и Мафэ ихэ-гъэу­нэфыкIын къыдыхэлъыта­гъэу блэкIыгъэ илъэсым Адыге­им и ЛIышъхьэ Указ къыди­гъэкIыгъ ветеран-фронтовикхэу Дзюба Иван Иван ыкъом ыкIи Кукэнэ Зулихъэ Индрис ыпхъум меда­лэу «Адыгеим и Щытхъузехь» зыфиIорэр афэгъэшъо­шэгъэнэу.

Ау пандемием ыпкъ къикIыкIэ тын лъапIэр аратыжьынэу хъугъэп. Гукъау нахь мышIэми, блэкIыгъэ илъэсым шышъхьэIу мазэм ыныбжь илъэс 98-м итэу Кукэнэ Зулихъэ идунай ыхъо­жьыгъ.

АР-м и Къэралыгъо филармоние щыкIогъэ Iофтхьабзэм Хэгъэгу зэошхом иветеранэу Иван Дзюбэ медалыр щыраты­жьыгъ. Джащ фэдэу тын лъапIэмрэ ащ пылъ тхьапэхэмрэ IэкIагъэхьажьыгъэх Кукэнэ Зулихъэ ыкъоу, Урысыем ыкIи Адыгеим инароднэ артистэу Кукэнэ Мурат.