Адыгеим и ЛIышъхьэ афэтхьаусыхагъ
ЖъоныгъуакIэм и 11-м къалэу Казань дэт еджапIэу N 175-м къыщыхъугъэ тхьамыкIагъом цIыфхэр лъэшэу зэридзагъэх.
Мы учреждениер къэзыухыгъэ кIэлэеджакIом Iашэр къызфигъэфедэзэ нэбгырибгъу ыукIыгъ, ахэм ащыщэу блыр кIэлэцIыкIух, нэбгырэ 23-мэ шъобжхэр атещагъэхэ хъугъэ. Мы хъугъэ-шIэгъэ тхьамыкIагъом зигупсэхэр хэкIодагъэхэм ыкIи шъобж хэзыхыгъэхэм афэтхьаусыхагъ ыкIи якъин адигощыгъ Адыгеим и ЛIышъхьэу КъумпIыл Мурат.
— ТхьамыкIэгъошхо Татарстан къыщыхъугъ. Ащ кIэлэцIыкIухэр хэкIодагъэх. Ар чIэнэгъэшху. Адыгеим исхэм ацIэкIэ Татарстан ипащэу Рустам Миннихановым, республикэм щыпсэухэрэм, зидунай зыхъожьыгъэхэм ягупсэхэм ыкIи яблагъэхэм сафэтхьаусыхэ, — къыщеIо КъумпIыл Мурат итхыгъэ.
БзэджэшIагъэр зезыхьагъэр къаубытыгъ, уголовнэ Iоф къызэIуахыгъ.