Хэдзыным зыфэгъэхьазырыгъэнымкIэ «Единэ Россиер» гуфакIохэм IэпыIэгъу афэхъу
Экспертхэм политикэм зыкIуачIэ щызыушэтырэ общественникхэм апае апэрэ онлайн-семинарыр Апшъэрэ партийнэ еджапIэм щызэхащагъ.
Социальнэ маркетингымкIэ институтэу «ИНСОМАР» зыфиIорэм политикэ анализымкIэ ипащэу Виктор Потуремскэм, семинарым иэкспертхэм ащыщым, зэрилъытэрэмкIэ, общественнэ IофшIэнхэм апылъхэм кадрэ дэгъухэр къахэкIыщтых.
Виктор Потуремскэм кандидат-общественникхэм къафиIотагъ коронавирусым зыкъызэриштагъэм епхыгъэу хэдзакIохэм яеплъыкIэхэр зэхъокIыгъэ зэрэхъугъэр, медицинэм, социальнэ лъэныкъом, экономикэм, гъэсэныгъэм япхыгъэ Iофыгъохэм ар алъыIэсыгъ.
ФоРГО-м иправление итхьаматэу Константин Костиным къызэриIуагъэмкIэ, общественникхэр хэдзын Iофтхьабзэхэм зэрахэлажьэхэрэр партийнэ стратегием дештэ.
Урысые народнэ фронтым иныбжьыкIэ организацие ипащэу Игорь Кастюкевич зэрэхигъэунэфыкIыгъэмкIэ, пэшIорыгъэшъ мэкъэтыным хэлэжьэнэу тезыубытагъэхэм, зыкIуачIэ политикэм щызыушэты зышIоигъохэм мыщ фэдэ семинарыр лъэшэу къашъхьапэщт.
Общественникхэр хэдзынхэм ахэлэжьэнхэ зэрэфаем Урысые Федерацием и Президент тапэкIи къыдыригъэштэгъагъ. Урысые Iофтхьабзэу «МыВместе» зыфиIорэм чанэу хэлэжьагъэхэм заIокIэми ащ фэгъэхьыгъэу къыIогъагъ. Владимир Путиным зэрилъытэрэмкIэ, хэгъэгум хэхъоныгъэ ышIынымкIэ ащ ишIуагъэ къэкIощт. Сыда пIомэ гуфэкIо движениехэм ахэтхэм Iофыгъо зэфэшъхьафхэм язэшIохынкIэ еплъыкIэ шъхьафхэр яIэх.
«Единэ Россием» и Генеральнэ совет исекретарэу Андрей Турчак джащыгъум зэрэхигъэунэфыкIыгъагъэмкIэ, хэдзынхэм зафэгъэхьазырыгъэнымкIэ партиер общественникхэм IэпыIэгъу афэхъущт. Партием ренэу кIочIакIэхэр къыхэхьэх. 2020-рэ илъэсым депутатэу хадзыгъэхэм япроцент 50-р кандидатыкIэх. Ахэм сэнэхьат зэфэшъхьафхэр яI — врачых, кIэлэегъаджэх, предпринимателых, бизнес цIыкIумрэ гурытымрэ апыщагъэх.
«Единэ Россием» ипэшIорыгъэшъ мэкъэтын изэхэщэнкIэ Адыгэ шъолъыр гъэцэкIэкIо комитетым хэтэу, Адыгэ Республикэм ибзылъфыгъэхэм я Союз итхьаматэу Ворэкъо Хьалимэт зэрилъытэрэмкIэ, политикэм акIуачIэ щаушэтынэу волонтерхэр хьазырых.
«Пандемием илъэхъан волонтер движением къыхэхьэгъэ нэбгырабэмэ тицIыфхэр зыгъэгумэкIырэ Iофыгъохэм язэшIохынкIэ еплъыкIэ гъэнэфагъэхэр яIэх, — къыIуагъ Ворэкъо Хьалимэт. — ГуфакIохэм ежь-ежьырэу Iофыгъуабэ зэшIуахын фаеу хъугъэ. ЯчIыпIэгъухэр зыгъэгумэкIырэ Iофыгъохэм ахэр ащыгъуазэх, волонтерхэр непи цIыфхэм IэпыIэгъу афэхъух. Япроектхэр щыIэныгъэм щыпхырыщыгъэным гуфэкIуабэхэр фэхьазырых. Арышъ, волонтерхэр пэшIорыгъэшъ мэкъэтынымрэ хэдзынхэмрэ захэлажьэхэкIэ, ыпэкIэ лъыкIотэнхэ, цIыфхэм ящыIэкIэ-псэукIэ зыкъезыгъэIэтыщт проектхэм ягъэцэкIэнкIэ заушэтын алъэкIыщт.