ПэшIорыгъэшъ мэкъэтыным хэлажьэ зышIоигъохэм анахьэу политикэм зызкIыфагъэзагъэр цIыфхэм яфедэхэр къаухъумэнхэу ары. Зэпахырэ узым зэрэдунаеу зыщызэлъиштэгъэ лъэхъаным цIыфхэр ащ фэдэ IэпыIэгъум фэныкъох.

Граждан обществэм хэхъоныгъэ езыгъэшIырэ Фондым (ФоРГО) иправление итхьаматэу Константин Костиным зэрилъы­тэрэмкIэ, политикэм зыщызыушэты зышIоигъохэм, пэшIорыгъэшъ мэкъэтыным хэлажьэхэзэ, хэдзакIохэм укъызэраде­кIокIын фэе шIыкIэм зыфагъасэ. ГуфакIохэр тапэкIэ общественникэу щытыгъэхэмэ, цIыфхэм IэпыIэгъу афэхъущтыгъэхэмэ, джы политикэ Iофхэм апылъыщтых.

«Единэ Россием» ипэшIорыгъэшъ мэкъэтын хэлэжьэнхэу заявкэ къэзытыгъэмэ языщанэр гуфакIох, общественникых. ЦIыфхэр зыгъэгумэкIырэ Iофыгъохэр ахэм дэгъоу ашIэ. Кандидатхэм зэралъытэрэмкIэ, шъо­лъырхэм яеплъыкIэхэр федеральнэ гупчэм лъызыгъэ­Iэсынхэ зылъэкIыщт цIыфыкIэхэр хэбзэ IэнатIэхэм аIугъэхьэгъэнхэ фае.

ПэшIорыгъэшъ мэкъэтыным хэлэжьэщтхэм къызэраIуагъэмкIэ, ахэр политикэм зыкIыхэхьагъэхэр социальнэу дэеу ухъумэгъэ цIыф куп заулэмэ IэпыIэгъу ягъэгъотыгъэным, инфраструктурэ, экономикэ проектхэм зягъэушъомбгъугъэным апай.

Социальнэ маркетингымкIэ Институтэу «ИНСОМАР» зыфиIорэм политикэ анализымкIэ ипащэу Виктор Потуремскэм зэрэхигъэунэфыкIыгъэмкIэ, политикэм зыфэзыгъэзэрэ волонтерым лъэныкъуакIэмкIэ пшъэ­рылъэу ыгъэцэкIэщтхэр икъоу ышIэнхэ фае.

Адыгеим игуфакIохэми пэшIо­рыгъэшъ мэкъэтыным хэлажьэхэ ашIоигъу.

«Мы Iофтхьабзэм сэ анахьэу сызкIыхэлэжьэщтыр ныбжьыкIэхэм яфедэхэр къэсыухъумэхэ сшIоигъошъ ары, — къы­­Iуагъ «Единэ Россием и НыбжьыкIэ гвардие» хэтэу, тиреспубликэ щыпсэурэ Лиовник Багдасарян. — НыбжьыкIэхэм яне­ущырэ мафэ Урысыемрэ къызыщы­хъугъэ шъо­лъы­рымрэ арапхын фае. Тиреспуб­лики хэгъэгуми хэхъоныгъэ языгъэшIыщтыр ныб­жьыкIэ хъуп­хъэхэр ары».

Кандидатхэр къызагъэлъэгъо­рэ апэрэ мазэм къыкIоцI пэшIо­рыгъэшъ мэкъэтынымкIэ «Единэ Россием» изэхэщэкIо комитетхэм лъэIу тхылъ 3300-м ехъу къаIэкIэхьагъ. Iофтхьабзэм хэлажьэ зышIоигъохэм азыныкъо фэдизыр гуфакIох, общественникых, социальнэ лъэныкъом иIофышIэх. Ящэнэрэ кандидат пэпчъ бизнес цIыкIум е гурытым пыщагъ. Къэралыгъо Думэм ихэдзын хэлажьэ зышIоигъохэм япроцент 30 фэдизмэ аныбжь илъэс 35-м нэсыгъэп.

Мэлылъфэгъум и 29-м нэс кандидатхэр атхыщтых. Официальнэ сайтэу «pg.er.ru» зыфиIорэм ящыкIэгъэ къэбархэр рагъотэнхэ алъэкIыщт. Онлайн шIыкIэм тетэу жъоныгъуакIэм и 24-м къыщегъэжьагъэу жъоныгъуакIэм и 30-м нэс амакъэ атышъущт. Порталэу «Къэралыгъо фэIо-фашIэхэр» зыфиIорэмкIэ Урысыем регистрацие щашIыгъэхэм Iофтхьабзэм хэлэжьэнхэ алъэкIыщт. ПэшIорыгъэшъ мэкъэтынымкIэ кIэуххэр мэкъуогъум и 1-м зэфахьысыжьыщтых. Ащ ыуж «Единэ Россием» икандидатхэу Къэралыгъо Думэм хагъэхьанхэу къагъэлъэгъуагъэхэм яспискэ зэфэсым щаухэсыщт.