ТекIоныгъэм ия 76-рэ илъэс фэгъэхьыгъэ концертхэр, театрализованнэ къэгъэлъэгъонхэр, зэIукIэгъухэр Адыгэ Республикэм щыкIуагъэх.

Республикэм и Къэралыгъо филармоние щызэхащэгъэ мэфэкI зэхахьэм Адыгеим иансамблэ анахь дэгъухэр, артист цIэрыIохэр хэлэжьагъэх.

Урысыем, Адыгеим янароднэ артистэу, Абхъазым, Пшызэ язаслуженнэ артистэу Кукэнэ Мурат лIы­хъужъныгъэм, шIэжьым яхьылIэгъэ усэмкIэ мэфэкI Iофтхьабзэр къызэIуихыгъ.

Республикэм и Къэралыгъо филармоние иансамблэу «Ошъутенэм» иартистхэу Даутэ Сусанэ, ПIатIыкъо Маринэ, Юрий Конжиным шIэжь орэдхэр къаIуагъэх.

Орэдыр о зигъэгъус

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм тыпэгъокIызэ, Iофтхьабзэу республикэм щыкIохэрэм анахьэу къахэдгъэщырэр хэхъоныгъэу тшIыгъэхэр ары.

Адыгэ Республикэм и Къэралыгъо ансамблэу «Ислъамыер» илъэс 30 зэрэхъугъэр мыгъэ игъэ­кIотыгъэу хигъэунэфы­кIыщт. Урысыем, Адыгеим янароднэ артистэу, композиторэу Нэхэе Аслъан «Ислъамыем» ихудожественнэ пащ, Урысыем и Правительствэ и Къэра­лыгъо премие илауреат.

«Ислъамыем» Хэгъэгу зэошхом фэгъэхьыгъэ орэдхэр къыIуагъэх. Зэ­лъашIэрэ «Катюшэм», ки­но­фильмэхэм ахэт орэдхэр урысыбзэкIэ ыгъэ­жъынчыгъэх. «ТекIоныгъэм и Маф» зыфиIорэ орэдыр адыгабзэкIэ филармонием щыIугъ. Залым чIэсхэр къэтэджыхи, артистхэм афэразэхэу шъхьащэ афашIыгъ. ОрэдыIохэу Хъо­кIо Сусанэ, Агъыржьэнэкъо Саныет, Къумыкъу Щамсудинэ, Шъымырзэ Казбек, МэщбэшIэ Саидэ, фэшъхьафхэм бэрэ Iэгу афы­теуагъэх.

ЛIыхъужъхэр къытхэтых

Адыгэ Республикэм и Къэралыгъо академическэ къэшъокIо ансамблэу «Налмэсым» театрализованнэ къэшIынэу къыгъэлъэгъуагъэр революционнэ, лIыхъужъ ыкIи лэжьэкIо щытхъум япхыгъэ мэфэкI Iофтхьабзэхэм ащыщ.

«Налмэсым» ихудожественнэ пащэу, Урысы­ем, Абхъазым, Пшызэ язаслуженнэ артистэу, Адыгеим инароднэ артистэу Хъо­джэе Аслъан къызэрэти­Iуагъэу, патриотическэ пIуныгъэм ехьылIэгъэ къэ­шIынхэр щыIэныгъэм щыщых, лIыхъужъхэр гъашIэм щытигъусэх.

Советскэ Союзым и ЛIыхъужъэу Андырхъое Хъусен Украинэм щызаозэ фашист техакIохэм зэ­рапэуцужьыгъэр, лIыхъу­жъэу зэрэфэхыгъэр, хэ­гъэгум идзэкIолIхэм заом ТекIоныгъэр къызэрэщыдахыгъэр, Адыгеим щыщхэу Д. Нэхаим, Л. Журавлевым, Къ. Бжыхьа­къом, нэмыкIхэм заом лIыхъужъныгъэ зэрэщызэрахьагъэр, ТекIоныгъэр къыдахыгъэу тидзэкIолIхэм ядэжь къызэрагъэзэжьыгъэр, яIахьылхэр, пшъэшъэ ныбжьыкIэхэр зэрапэгъо­кIыгъэхэр, нэмыкI едзы­гъохэр щыIэныгъэм къы­хэхыгъэх.

Къашъохэр, лIэужхэр зэзыпхырэ пычыгъохэу «Налмэсым» иартистхэм къашIыгъэхэм узыIэпащэ. ДзэкIолI шъуашэхэр ащыгъэу «Налмэсым» хэтхэр зэрэуджыхэрэм уегъэгу­шхо. Лъэхъэнэ зэфэшъхьафхэр къагъэлъагъохэзэ, лIэужхэм язэпхыныгъэхэр агъэпытэх.

Урысыем щызэлъашIэрэ артистэу Бэгъ Саид шIэ­жьым, пIуныгъэм яхьылIэгъэ усэм къеджэзэ, щыIэныгъэм изэхъокIыныгъэхэр нэгум къыкIигъэуцуагъэх.

Театрэхэм язэхахь

Республикэм и Урыс театрэу А. Пушкиным ыцIэ зыхьырэмрэ АР-м и Къэралыгъо Камернэ музыкальнэ театрэу А. Хьанэ­хъум ыцIэ зыхьырэмрэ зэгъусэхэу мэфэкI кон­цертыр къатыгъ. «Налмэсым» и Унэ дэжь щызэхащэгъэ зэIукIэгъум Адыгеим инароднэ артисткэу Ирина Кириченкэм, рес­публикэм изаслуженнэ ар­тистхэу Елена Лепиховам, Виктор Марковым, фэшъхьафхэм орэдхэр къаIуагъэх. Артистхэу Кобл Зурыетрэ Тлий Бэлэрэ Андырхъое Хъусен фэгъэ­хьыгъэ орэдыр адыгабзэкIэ агъэжъынчыгъ.

ШъхьакIумыдэ Нурыет ыдэжь

Адыгеим щызэлъашIэрэ артисткэу, театрэм иветеранэу ШъхьакIумыдэ Нурыет Мыекъуапэ щэпсэу. Ащ ыдэжь театрэхэм яIофышIэхэр щыIагъэх. Урыс театрэм ипащэу Роман Корчагэрэ Камернэ музыкальнэ театрэм ихудожественнэ пащэу Сулейманов Юнысрэ ШъхьакIумыдэ Нурыет фэгушIуагъэх, гущыIэ фабэхэр фаIуагъэх. Орэдэу «Журавли» зыфиIорэр къыфаIуагъ. Наталья Амельченкэм орэдэу «Катюшэр» къызыхе­дзэм, Н. ШъхьакIумыдэр къадежъыугъ.

МэфэкIым щызэфэгушIох

АР-м искусствэхэмкIэ иколледжэу Тхьабысымэ Умарэ ыцIэ зыхьырэм мэ­фэкI концерт щыкIуагъ, къэгъэлъэгъонхэр къыщызэIуахыгъэх.

— Хэгъэгу зэошхом лIы­гъэ щызезыхьагъэхэр гъа­шIэм зэрэщагъэлъапIэхэ­рэр зэхахьэм къыщагъэлъэгъуагъ, — къытиIуагъ Адыгэ Республикэм культурэмкIэ и Министерствэ иотдел ипащэу Шэуджэн Бэлэ. — Творческэ куп­хэм яорэдхэмкIэ, къашъо­хэмкIэ цIыфхэр агъэгу­шIуагъэх.

ТхылъеджапIэхэм, Мые­къуапэ ипсэупIэхэм концертхэр къащатыгъэх, кинофильмэхэр къащагъэ­лъэгъуагъэх, ТекIоныгъэм фэгъэхьыгъэ сурэт къэгъэ­лъэгъонхэр, нэмыкIхэри гъэшIэгъонэу зэхащагъэх, саугъэтхэм къэгъагъэхэр акIаралъхьагъэх. ЛIэужхэр зэзыпхырэ мэфэкI зэха­хьэхэм лъэпкъ зэфэшъхьафхэр ахэлэжьагъэх, языкIыныгъэ щыIэныгъэм зэрэщыпытэрэр мэфэкI мафэхэм къащылъэгъуагъ.

ЕмтIылъ Нурбый.