Республикэм имуниципальнэ образованиехэм ячIыпIэ 38-мэ дунэе Iофтхьабзэу «Диктант Победы» зыфиIорэр ащыкIуагъ.

Федеральнэ партийнэ про­ектэу «Тарихъ шIэжь» зыфи­Iорэм къыдыхэлъытэгъэ Iоф­тхьабзэм кIэщакIо фэхъугъэхэр Урысые тарихъ общест­вэмрэ движениеу «Волонтеры Победы» зыфиIорэмрэ ары.

Адыгеим имуниципальнэ образованиехэм ячIыпIэ 38-мэ диктантыр ащатхыгъ, чIыпIэ 33-р гъэсэныгъэ языгъэгъотырэ учреждениехэм, тхылъеджапIэ- хэм, 5-р — дзэ частьхэмрэ Росгвардиемрэ ячIыпIэхэм къа­щызэIуахыгъагъ. Дзэ ведомст­вэхэр мыгъи патриотическэ Iоф­тхьабзэм хэлэжьагъэх.

ТекIоныгъэм имузееу Москва дэтым мэфэкI шIыкIэм тетэу Iофтхьабзэр къызэрэщызэIуахыгъэр чIыпIэ пстэуми къащатыгъ. «Единэ Россием» и Тхьаматэу Дмитрий Медведевым Iофтхьабзэу «Диктант Победы» зыфиIорэр къызэIуихыгъ, ащ хэлажьэхэрэм къафэгушIуагъ.

АдыгеимкIэ чIыпIэ шъхьаIэу хъугъэр Мыекъопэ къэралыгъо технологическэ университетым итхылъеджапI ары. Мыщ студент, кIэлэеджэкIо 40-м ехъу, «Единэ Россием» и Адыгэ шъолъыр къутамэ илIыкIохэр, НыбжьыкIэ гвардием хэтхэр, партием ипэшIорыгъэшъ мэкъэтын хэла­жьэхэрэр, кIэлэегъаджэхэр, Iофтхьабзэр зэхэзыщагъэхэр къыщызэрэугъоигъагъэх.

Iофтхьабзэр рамыгъажьэзэ федеральнэ партийнэ проектэу «Тарихъ шIэжь» зыфиIорэм АдыгеимкIэ икоординаторэу, республикэм и Къэралыгъо Совет — Хасэм идепутатэу, Урысыем и ЛIыхъужъэу Цэй Эдуард шIуфэс псалъэ къышIыгъ.

«Илъэс 76-кIэ узэкIэIэбэжьмэ, тицIыфхэр террорым те­кIуагъэх. А зэо пхъашэр къызэмыгоогъэ унагъо Урысыем исэп. Илъэс къэс мыщ фэдэ мафэм заом къимыкIыжьы­гъэхэр, зыпсэ зытыгъэхэр, тылым зишъыпкъэу щылэжьагъэхэр тыгу къэтэгъэкIыжьых. Тятэхэм, тятэжъхэм, тятэжъ пIа­шъэхэм Хэгъэгу гупсэм ишъхьа­фитыныгъэ къаухъумагъ. Родинэм узэрэфэшъыпкъэн, шIу плъэгъун зэрэфаемкIэ ахэр ренэу щысэтехыпIэу тиIэх.

Заом щызэуагъэхэм, пыим текIуагъэхэм ячIыфэшхо къыттенагъ. Пшъэрылъ лъапIэу ти­Iэр ТекIоныгъэр къытфыдэзы­хыгъэхэр тщымыгъупшэнхэр ары. Iофтхьабзэу «Диктант Победы» зыфиIорэмкIэ Хэгъэгу зэошхом хэлэжьагъэхэм тызэрафэразэр къэтэгъэлъагъо», — къыIуагъ Урысыем и ЛIы­хъужъ.

Адыгеим ичIыпIэ шъхьэихыгъэхэм ащыкIогъэ Iофтхьа­бзэм нэбгырэ 2000-м ехъу хэлэжьагъ, онлайн шIыкIэм тетэу диктантыр зытхыгъэр ащ нахьи нахьыбэжь.