Хэгъэгум футболымкIэ иапшъэрэ куп хэт футбол клубэу «Зенитым» Санкт-Петербург 2020 — 2021-рэ илъэс зэнэкъокъум апэрэ чIыпIэр къыщыдихыгъ.

ЖъоныгъуакIэм и 1 – 3-м Урысыем футболымкIэ изэнэ­къокъу хэлэжьэрэ командэхэм я 28-рэ ешIэгъухэр яIагъэх.

КIэуххэр

«Зенит» — «Локомотив» — 6:1, «Ростов» — «Тамбов» — 2:0, «Краснодар» — «Шъачэ» — 1:3, ЦСКА – «Уфа» — 1:1, «Рубин» — «Динамо» — 2:0, «Ротор» — «Ахмат» — 1:0, «Химки» — «Урал» — 1:0, «Арсенал» — «Спартак» — 1:2.

«Зенит» зэнэкъокъум ятIонэрэ чIыпIэр щызыIыгъ клубэу «Локомотивым» 6:1-у текIуи, ыуж къи­нэ­­хэрэм нахь чыжьэу апэ ишъыгъ. Клуб пэпчъ зэIукIэгъуи 2 къыфэнагъэу «Зенит» дышъэ медальхэр къыдихыгъэх.

Клубым итренер шъхьаIэу Сергей Семак, ешIакIохэм тафэгушIо. «Зенит» итарихъ къыхэтэгъэщы хэгъэгум гъогогъуи 7 апэрэ чIыпIэр къызэрэщихьыгъэр. Илъэ­си 3 хъугъэу зэкIэлъыкIоу апэрэ чIыпIэр Урысыем къыщыдихыгъ.

Европэм ичемпионхэм я Кубок фэбэнэщтхэр хэгъэгум изэнэкъо­къу апэрэ чIыпIи 2-р къыщыдэзыхырэ футбол клубхэр арых. «Спартак» гугъэу иIэм хэхъуагъ. «Арсенал» къызэринэкIи, «Локомотивым» ыпэ ишъыжьыгъ.

«Локомотив» зэIукIэгъу хьылъэ­хэр иIэщтых. Тыжьынымрэ джэрзымрэ зыхьыщтхэр кIэух ешIэгъу­хэм къагъэнэфэщт.

Адыгэмэ ятарихъ къалэу Шъачэ футбол клуб апэрэ чIыпIи 6-мэ афэбанэ, Европэм и Кубок фэгъэ­хьыгъэ зэIукIэгъухэм ахэлэжьэн имурад.

«Тамбов», «Ротор», нэмыкI клубхэу ауж къинэхэрэм язэIукIэгъухэм тшIогъэшIэгъонэу талъыплъэщт. «Тамбов» апшъэрэ купым хэзыгъэу тэлъытэми, зэнэкъо­къум джыри хэлажьэ.

«Адыгэ макъэм» еджэхэрэм ацIэкIэ «Зенит» тыфэгушIо, Евро­пэм иклуб лъэшхэм ащыщ хъунэу фэтэIо.