ЖъоныгъуакIэм и 9-р — советскэ цIыфхэм 1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызыщыдахыгъэ Маф
Хэгъэгу зэошхом иветеранхэу лъытэныгъэ зыфэтшIыхэрэр!
ТичIыпIэгъу лъапIэхэр!
Тихэгъэгу илIэуж пстэури зэзыпхырэ мэфэкI лъапIэм — ТекIоныгъэм и Мафэ фэшI тышъуфэгушIо!
Хэгъэгу зэошхом илъэуж къызэрымынэгъэ унагъо гори Урысыем исэп пIоми хъущт. Тятэхэм, тятэжъхэм, тятэжъ пIашъэхэм лъыгъэчъэ зэошхом ихьазабхэр ащэчын фаеу хъугъэ.
Советскэ дзэкIолIхэу лIыхъужъныгъэшхо зезыхьагъэхэм, тихэгъэгу ишъхьафитыныгъэ къэзыухъумагъэхэм, зэрэдунаеу фашизмэм щызыухъумагъэхэм ящытхъу илъэс къэс жъоныгъуакIэм и 9-м тэIо, зэуапIэм къимыкIыжьыгъэхэр тщыгъупшэхэрэп.
Тиветеранхэм, ТекIоныгъэр къыдэзыхыгъэхэм, Iашэ зыIыгъэу хэгъэгур фашист техакIохэм ащызыухъумагъэм, зышъхьамысыжьэу тылым щылэжьагъэхэм лъхъанчэу шъхьащэ афэтэшIы.
Хэгъэгу зэошхом хэлэжьагъэхэр гукIочIэшхо зэряIагъэмкIэ, лъэгъуныгъэ ин Родинэм зэрэфыряIагъэмкIэ тихэгъэгу илIэуж пстэухэмкIи ренэу щысэтехыпIэу щытыщтых. Лъытэныгъэшхо зыфэтшIырэ ветеранхэр! Тэ сыдигъуи тышъурыгушхощт, щысэтехыпIэу шъутиIэщт.
Псауныгъэ пытэ, щыIэкIэ-псэукIэшIу шъуиIэнэу, шъуигъашIэ кIыхьэ хъунэу, мамырэу шъущыIэнэу тышъуфэлъаIо!
ТичIыпIэгъу лъапIэхэр, мэфэкIымкIэ джыри зэ тышъуфэгушIо! ШъунасыпышIонэу, Адыгеими Урысыеми яфедэ пае IофышIоу ешъухьыжьэхэрэм гъэхъагъэхэр ащышъушIынэу шъуфэтэIо!
Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет – Хасэм и Тхьаматэу Владимир Нарожный