Адыгэ Республикэм и Апшъэрэ хьыкум илъэс пчъагъэрэ ихьыкумы­шIа­гъэу, Урысыем ыкIи Адыгэ Республикэм язаслуженнэ юрис­тэу, Хэгъэгу зэошхом хэлэжьагъэу, дзэ щытхъум иорден ыкIи медаль зэфэшъхьафхэр къызфагъэшъошэгъэ Иван Погожевым зыщыпсэу­щты­гъэ унэм мыжъобгъу къыщыфызэIуахыгъ.

Ащ фэгъэхьыгъэ Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, республикэм и Апшъэрэ хьыкум и Тхьаматэу Шумэн Байзэт, сенаторэу, партиеу «Единэ Россием» хэтэу Хъопсэрыкъо Мурат, ведомствэ зэфэшъхьафхэм ялIыкIохэр, республикэм ихьыкум сообществэ хэтхэр, И. Погожевым иунагъу.

Зихэгъэгу шIу зылъэгъущтыгъэ, зисэнэхьат хэшIыкI ин фызиIэгъэ Иван Погожевым ишIэжь зэрагъэлъапIэрэм, мыжъобгъу къызэрэфызэIуахырэм мэхьанэшхо зэриIэр АР-м и ЛIышъхьэ къыхигъэщыгъ.

— Иван Погожевым ищыIэныгъэ гъогу щысэтехыпIэу щыт. Тихэгъэгу къэзыухъумэгъэ, зэо ужым къэралыгъом изыкъе­гъэIэтыжьын зиIахьышIу хэзылъхьагъэхэм ар ащыщ. IофшIэныр Адыгеим щыригъэжьэгъагъ ыкIи республикэм ищыIэныгъэ рип­хыгъ. Илъэс 40 фэдизрэ хьыкум системэм Iоф щишIагъ, — къы­Iуагъ КъумпIыл Мурат.

Шъолъырым хэхъоныгъэхэр ышIынхэм зиIахьышIу хэзылъхьагъэхэм яшIэжь тапэкIи агъэ­лъэпIэн зэрэфаер, ащкIэ респуб­ликэм ипащэхэр IэпыIэгъу къа­зэрафэхъущтыр республикэм и ЛIышъхьэ къыхигъэщыгъ.

Апшъэрэ хьыкумым и Тхьаматэу Шумэн Байзэт, АР-м ихьыкум сообществэ иветеранхэм я Совет ипащэ игуадзэу Анатолий Горголиныр, И. Погожевым ипшъашъэу Людмила Прищеповар нэужым къэгущыIагъэх. ЛIыхъужъым фэгъэхьы­гъэу гущыIэ дэхабэ къаIуагъ.

Иван Погожевым Хэгъэгу зэошхом иорденэу ятIонэрэ шъуашэ зиIэр, джащ фэдэу «За победу над Германией», «За безупречную службу» зыфиIорэ медальхэр, нэмыкIхэр къыфагъэшъошагъэх.

Дзэ къулыкъум ыуж 1951-рэ илъэсым И. Погожевым еджапIэр къыухыгъ ыкIи Ленинград дэт университетым июридическэ факультет чIэхьагъ. Апшъэрэ еджапIэр къызеухым следователэу, Адыгэ автоном хэкум имилицие иследователь шъхьа­Iэу Iоф ышIагъ. Нэужым Адыгэ автоном хэкум ихьыкум и Президиум хэхьагъ ыкIи щэгъо­гогъо ащ хадзыжьыгъ. 1992-рэ илъэсым Адыгеим и Апшъэрэ хьыкум исудья хъугъэ ыкIи 2002-рэ илъэсым нэс ащ Iоф щишIагъ.

Делэкъо Анет.