ГукъэкIыжьыр гъашIэм щагъэлъапIэ

Хэгъэгу зэошхом ТекIоныгъэр къызыщыдахыгъэр илъэс 76-рэ зэрэхъурэм фэгъэхьыгъэу машинэхэр зэхэтхэу Мыекъуапэ икIыхи, Тэхъутэмыкъое районым икъуаджэу Афыпсыпэ нэсыгъэх.

Мыекъуапэ щыIэ зэхэт саугъэт­хэу Хэгъэгу зэошхом илъэхъан лIыхъужъэу фэхыгъэхэм афэгъэ­хьыгъэхэм апашъхьэ зэхахьэр щырагъэжьагъ.

ШIэжь тиI

Урысые Федерацием и ДОСААФ икъутамэу Адыгеим щыIэм ипащэу Барцо Тимур зэхахьэм къыщиIуагъ республи­кэм щыпсэурэ лъэпкъхэм языкIыныгъэ щыIэныгъэм зэрэщыпы­тэрэр. Фашист техакIохэр 1941-рэ илъэсым тихэгъэгу къызытебанэхэм, тидзэхэм пыйхэр зэ­рэ­зэхакъутагъэхэм лъапсэ фэхъу­гъэр Советскэ Союзым ис цIыф­хэр пытэу зэрэзэкъоуцуагъэхэр ары.

— Тарихъым инэкIубгъохэр тщыгъупшэхэрэп, — къыIуагъ Адыгэ Республикэм иветеранхэм я Совет итхьаматэу Къуаджэ Аслъан. — ШIэжь тиIэу тэпсэу. НыбжьыкIэхэм тарихъыр нахьы­шIоу ашIэным фэшI мыщ фэдэ зэIукIэгъухэр илъэс къэс зэхэтэщэх.

ЛIэужхэм язэпхыныгъэхэр

ДОСААФ-м, ветеранхэм я Совет Iофэу ашIэрэр лIэужхэм язэпхыныгъэ игъэпытэн ехьы­лIагъ. Тарихъ шIэныгъэхэмкIэ докторэу Ацумыжъ Казбек иеплъы­кIэхэм къащыхигъэщыгъ блэкIыгъэ лъэхъаныр зыфэда­гъэр нахь дэгъоу цIыфхэм зэрагъэшIэным фэшI шъыпкъэныгъэ зыхэлъ литературэр ящыкIагъэу зэрэщытыр.

ТекIоныгъэр Хэгъэгу зэошхом къыщыдэхыгъэным советскэ народымрэ ащ и УIэшыгъэ КIуа­чIэхэмрэ яIахьэу халъхьагъэр тарихъым хагъэкIуа­кIэ хъущтэп.

Ятэ илъэуж

Джэджэ районым къикIыгъэ Зоя Макаренкэм ятэу Семен Лесноир иныбжьыкIэгъум тракторым тесыгъ. Заор къежьэным ыпэкIэ бзылъфыгъи 3 тракторым тесынхэу ыгъэ­сагъэх.

— Новороссийскэ икъэухъумэн сятэ хэлажьэзэ, лIыхъу­жъэу зэрэфэхыгъэр тшIэщтыгъэ, ау чIыпIэу зыщагъэтIылъы­гъэм тыщыгъоза­гъэп. 2011-рэ илъэсым сятэ ихьадэ зычIэлъ къэр къэдгъотыжьыгъ. Заор тхьамыкIагъу, къэрэмыхъужь ащ фэдэ зао, — къытиIуагъ Зоя Макаренкэм.

ЛIыхъужъхэр ящысэх

Революционнэ, лIыхъужъ щытхъум афэгъэхьыгъэ саугъэтхэм зэхахьэм хэлэжьагъэхэр якIолIа­гъэх, зыпсэ зытыгъэхэм шъхьащэ афашIыгъ. Хэгъэгум фэзэогъэ дзэкIолIхэм ясаугъэт къэгъагъэхэр кIэлъыралъхьагъэх. — Дзэ-патриотическэ, интернациональнэ пIуныгъэр лъэхъаным диштэу зэхэщэгъэным мэхьэ­нэ ин етэты, — къыIуагъ Барцо Тимур. — УIэшыгъэ КIуачIэхэм яветеранхэр, дзэ-спорт джэгукIэхэм ахэлажьэхэрэ кIэлэеджа­кIохэр, ныбжь зэфэшъхьаф зи­Iэхэр зэхахьэм щызэIукIагъэх. Хэгъэгу зэошхом лIыхъужъныгъэ щызезыхьэгъэ дзэкIолIхэр егъашIи щысэу тиIэщтых. Маши­нэхэр зэхэтхэу Афыпсыпэ екIурэ гъогум техьагъэх.

Зэхэтхэу рыкIуа­гъэх

Мыекъуапэ щырагъажьи, машинэхэр зэхэтхэу Адыгеим игъо­гухэм арыкIуагъэх. Апэу Пэнэ­жьыкъуае къыщыуцугъэх. Къуа­джэм дэт саугъэтым ыпашъхьэ щыкIогъэ зэхахьэм къыщыгущыIагъэх Теуцожь районым иветеранхэм я Совет итхьаматэу Хэкужъ Аслъанбый, Адыгеим иветеранхэм я Совет итхьаматэу Къуаджэ Аслъан. Хэгъэгу зэо­шхом ТекIоныгъэр къыщыдэхыгъэным дзэкIолI къызэрыкIохэр пхъашэу зэрэхэлэжьагъэхэр А. Къуаджэм хигъэунэфыкIыгъ.

Псым ычIэгъ хъугъэ къуаджэу Едэпсыкъуае щыщэу Виктор Старобогатовым къыIуагъ заом ыпэкIэ яунагъо Едэпсыкъуае къызэрэкощыжьыгъагъэр. Гуфэбэныгъэ ахэлъэу къуаджэм дэсхэр къазэрэпэгъокIыгъагъэхэр, псэукIэ дахэ зэрэщагъотыгъэр В. Старобогатовым щыгъупшагъэхэп, лъэшэу афэраз.

Адыгэкъалэ инароднэ депутатхэм я Совет итхьаматэу ТIэшъу Аскэр, шIэныгъэлэжьэу Ацумыжъ Казбек, нэмыкIхэри зэхахьэм къыщыгущыIагъэх. ДзэкIолI-спорт шъуашэхэр зыщыгъ кIэлэеджа­кIохэр усэхэм къяджагъэх. Адыгэ шъуашэкIэ фэпэгъэ шыухэр хьа­кIэхэм дахэу къазэрэпэгъокIыгъэ­хэм мэхьэнэ ин иIэу ылъытагъ республикэ ДОСААФ-м иотдел ипащэу Ирина Манченкэм.

Теуцожь, Тэхъутэмыкъое районхэм, Адыгэкъалэ, зэхахьэхэр зыщыкIогъэ къуаджэхэм япащэхэр, хэбзэ къулыкъушIэхэр, общественнэ организациехэм ялIыкIохэр, кIэлэеджакIохэр Те­кIоныгъэм ия 76-рэ илъэс фэгъэ­хьыгъэ Iофтхьабзэм хэлэжьагъэх.

1943-рэ илъэсым, мэзаем и 18-м Тэхъутэмыкъое районым икъуаджэхэм фашист техакIохэр ащызэхакъутагъэх, Адыгеир шъхьа­фит тидзэкIолIхэм зашIыжьыгъэр мыгъэ илъэс 78-рэ хъугъэ.

Адыгэкъалэ, Щынджые, Тэхъу­тэмыкъуае ащыкIогъэ зэхахьэхэм Мыекъуапэ икIыгъэхэу купым хэтхэр хэлэжьагъэх. Афыпсыпэ шъхьафит зэрэхъужьыгъагъэр районым щыщхэм зэхахьэм къы­щаIотагъ. Адыгэкъалэ иадминистрацие ипащэу М. ЛIыхасэм, нэмыкIхэм зэхахьэм къыщаIуагъ ТекIоныгъэр къыдэзыхыгъэ дзэ­кIолIхэр, заом ыкIыб щыIэхэу фронтым пае лэжьагъэхэр егъа­шIи зэрэтщымыгъупшэщтхэр.

ЕмтIылъ Нурбый.