ЖъоныгъокIэ мэфэкI мафэхэу къэблагъэ­хэрэм цIыфхэм ярэхьатныгъэ ыкIи ящынэ­гъон­чъагъэ хэбзэухъумакIохэм къаухъумэщт.

Адыгеим хэгъэгу кIоцI Iоф­хэмкIэ и Министерствэ ипресс­къулыкъу къызэритыгъэмкIэ, общественнэ рэхьатныгъэр къэу­хъумэгъэным фытегъэпсы­хьэгъэ Iофтхьабзэхэр зэкIэ агъэнэфэгъахэх.

Адыгеим ихэбзэухъумэкIо къу­лыкъухэм аIэ зэкIэдза­гъэу мы мафэхэм Iоф ашIэщт. ЦIыфыбэ зыщызэрэу­гъоирэ чIыпIэхэм анаIэ аты­ра­гъэтыщт. Мэ­фэкI Iофтхьа­бзэхэр зыщы­кIощт чIыпIэхэр зэкIэ пэшIорыгъэшъэу ауплъэкIугъэх.

ЦIыфыбэ зыщызэрэугъоихэ­рэм, къатыбэу зэтет унэхэм ядэ­кIояпIэхэм, транспортым цы­хьэшIэгъунчъэ пкъыгъохэр ащышъулъэгъунхэ шъулъэкIыщт.

Гу зылъышъутэгъэ пкъыгъор а чIыпIэм а уахътэм щымы­лъынэу щытмэ, шъунаIэ тешъумыдзэу къэшъумыгъан.

Транспортым ащ фэдэ пкъыгъо къыщыжъугъотыгъэмэ, исхэм яемэ шъукIэупчI, арэу щымытмэ водителым макъэ ежъугъэIу.

Сыдигъуи зыщышъумыгъэгъупш:

— къэжъугъотыгъэр къызэ­дэшъумых ыкIи шъумыгъэкощ;

— амал зэриIэкIэ зыер зэхэшъуф;

— ар зышъумыгъэунэфыкIэ лъэтемытэу полицием макъэ ежъугъэIу;

— цыхьэшIэгъунчъэ пкъыгъо къызэрэжъугъотыгъэр а чIыпIэм щыт цIыфхэм яжъугъашI ыкIи лъыкIотэнхэу яшъуIу;

— следственнэ-оперативнэ купыр къэсыфэ шъуеж.

Телефонхэр: +7(8772)59-64-00-рэ (АР-м и МВД). ЗыкI номерхэр: 102-рэ, 112-рэ.