Мэлылъфэгъум и 26-р — радиацием епхы­гъэ тхьамыкIагъохэм къыздахьыгъэхэм ядэгъэзыжьын хэлэжьагъэхэм я Маф. Гум имыкIыжьырэ ошIэ-дэмышIагъэр къызыхъугъэр илъэс 35-рэ хъугъэ. Ащ фэгъэхьыгъэ зэхахьэ чернобыльцэхэм ясаугъэт дэжь щыкIуагъ.

Ащ хэлэжьагъэх АР-м иминистрэхэм я Кабинет хэтхэр, къэралыгъо хабзэм икъулы­къу­хэм, общественнэ организа­циехэм ялIыкIохэр, депутатхэр, тхьамыкIагъохэм ядэгъэзыжьын хэлэжьагъэхэр, ахэм яIахьылхэр, ныбжьыкIэхэр, кIэлэеджакIохэр.

Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч къэзэрэугъоигъэхэм шIуфэс къарихыгъ. ХэмыкIокIэ­жьын лъэужэу тарихъым къы­хэнэгъэ хъугъэ-шIагъэм илъэс 35-рэ зэрэтешIагъэр ащ къыхигъэщыгъ. А уахътэм къыкIоцI лIэужыбэ къызэрэхъугъэр, ау а тхьамыкIагъом идэгъэзыжьын хэлэжьагъэхэм лIыхъужъныгъэу зэрахьагъэр цIыфхэм зэращымыгъупшэщтыр министрэм къыIуагъ.

— Адыгеим и ЛIышъхьэу КъумпIыл Мурат ыцIэкIи, сэ сшъхьэкIи радиацием епхыгъэ тхьамыкIагъохэм ядэгъэзыжьын хэлэжьагъэхэм «тхьашъуегъэ­псэу» ясэIо. ГухэкI нахь мышIэми, ахэм ащыщыбэхэм ядунай ахъожьыгъ. Къэралыгъо хабзэм икъулыкъухэм ялIыкIохэм псаоу къэнэгъэ нэбгырэ пэпчъ зэпхыныгъэ адыряI, ищыкIэгъэ Iэпы­Iэгъур арагъэгъотыным фэ­хьа­зырых, — къыIуагъ Мырзэ Джанбэч.

АР-м и Къэралыгъо Совет — Хасэм и Тхьаматэ игуадзэу Шъэо Аскэр къызэриIуагъэмкIэ, илъэс 35-кIэ узэкIэIэбэжьымэ, ЧАЭС-м къыщыхъугъэ тхьамыкIагъом нэбгырэ миллион пчъа­гъэмэ зэрар арихыгъ. Чернобыль къыщыхъугъэ аварием къыздихьыгъэ тхьамыкIагъохэм ядэгъэзыжьын бэ хэлэжьагъэр. Адыгеим ицIыфхэри ахэм ащыщых. ТхьамыкIагъом идэгъэзы­жьын хэлэжьэгъэ пстэуми шъхьа­щэ зэрафашIырэр ыкIи зэрафэразэхэр Шъэо Аскэр къыIуагъ, псауныгъэ пытэрэ на­сыпрэ ежьхэми, яунагъохэми яIэнэу къафэлъэIуагъ.

Сэкъатныгъэ зиIэхэм я ­Адыгэ республикэ организациеу «Союз «Чернобыль» зыфиIорэм ипащэу Едыдж Юрэ къызэриIуагъэмкIэ, 1986-рэ илъэсым Чернобыль иатомнэ электростанцие къыщыхъугъэ тхьамыкIагъор илъэс къэс мы мафэм тихэ­гъэгу исхэм агу къагъэкIыжьы.

— Адыгеим щыщэу нэбгырэ 800 фэдиз чэзыу-чэзыоу кIохэзэ радиацием пэуцужьыгъэх. Ахэм азыныкъо нахь макI джы псаоу къэнагъэр. Нэбгырэ пэпчъ лIыхъужъэу плъытэн фае, сыда пIомэ ахэр ящыIэныгъэ шъхьамысхэу, япсауныгъэ зэрарышхо екIызэ, акIыб дэтхэр, цIыфхэр радиацием имашIо щаухъумагъ, — хигъэунэфы­кIыгъ Едыдж Юрэ.

Чернобыль щыIагъэхэм лIы­хъужъныгъэу зэрахьагъэр лIэуж пчъагъэхэм къызэрахэнэщтыр, ар егъэшIэрэ шIэжьэу цIыфхэм агу зэрилъыщтыр ыкIи псаоу къэнагъэхэм амалэу щыIэмкIэ республикэр IэпыIэгъу зэрафэ­хъущтыр нэужым къэгущыIэгъэ пстэуми къыхагъэщыгъ.

Зэхахьэм икIэух зидунай зы­хъожьыгъэхэм яшIэжь агъэлъа­пIэзэ, къэзэрэугъоигъэхэр зы такъикърэ афэшъыгъуагъэх, сау­гъэтым къэгъагъэхэр кIэралъ­хьагъэх.

Iэшъынэ Сусан. Сурэтхэр Iэшъынэ Аслъан тырихыгъэх.