Терроризмэм пэшIуекIогъэнымкIэ комиссием зичэзыу зэхэсыгъоу тыгъуасэ иIагъэр зэрищагъ Адыгэ Республикэм и ЛIышъхьэу КъумпIыл Мурат.

ЖъоныгъокIэ мэфэкIхэр щы­нэ­гъончъэу зэхэщэгъэнхэм ыкIи мы мафэхэм общественнэ рэ­хьатныгъэр къэухъумэгъэным иIофыгъу ары анахь шъхьаIэу зытегущыIагъэхэр. Къихьащт мазэм и 1-м щегъэ­жьагъэу и 11-м нэс цIыфхэр жъугъэу зы­хэ­лэжьэщтхэ Iофтхьа­бзэхэр шъо­лъырым щырекIокIыщтых.

АР-м хэгъэгу кIоцI IофхэмкIэ иминистрэу Иван Бахиловым къызэриIуагъэмкIэ, цIыфхэр зы­щызэрэугъоихэрэ чIыпIэхэр щы­нэгъончъэнхэм фытегъэпсы­хьэгъэ план зэхагъэуцуагъ. Специалист-кинологхэм ыкIи оперативнэ-техническэ купхэм ахэр пэшIорыгъэшъэу къаплъы­хьащтых, мэфэкIхэр зыщыха­гъэунэфыкIыщт мафэхэм IофшIэныр нахь агъэлъэшыщт. МВД-м, Росгвардием икъулыкъушIэхэм цIыфхэм ярэхьатныгъэ къаухъу­мэщт, гъогурыкIоныр щынэгъон­чъэным лъыплъэщтых.

Мы лъэныкъохэмкIэ ведомствэхэм зэпхыныгъэ яIэу зэдэ­лэжьэнхэм мэхьанэшхо зэриIэр Адыгеим и ЛIышъхьэ хигъэунэфыкIыгъ ыкIи хэбзэухъумакIо­хэмрэ чIыпIэ зыгъэIорышIэжьын къулыкъухэмрэ пшъэрылъ гъэ­нэфагъэхэр афишIыгъэх.

— ЧIыпIэхэм Iоф зэрэщашIэ­рэр ары мыщ дэжьым анахь мэхьанэшхо зиIэр. Ащ къыхэ­кIыкIэ терроризмэм пэшIуекIогъэным фытегъэпсыхьэгъэ пэшIорыгъэшъ Iофтхьабзэхэм зэ­­кIэми муниципалитетхэм япа­­щэхэр ахэлэжьэнхэу закъы­фэ­сэгъазэ. Ащ фэдэ екIолIакIэм шIогъэшхо къытыщт, — къы­Iуагъ КъумпIыл Мурат.

2020-рэ илъэсым ыкIи илъэсэу тызыхэтым иапэрэ мэзищ терроризмэм пэшIуекIогъэнымкIэ муниципальнэ комиссиехэм Iофэу ашIагъэр зэфахьысыжьыгъ. Ащ фэгъэхьыгъэу къэгущыIагъэх Тэхъутэмыкъое районымрэ Адыгэкъалэрэ яадминистрациехэм япащэхэу Шъхьэ­лэхъо Азмэтрэ ЛIыхэсэ Махьмудрэ.

Республикэм ипащэ зэхэсыгъом зэфэхьысыжьхэр къыфишIызэ, терроризмэм пэшIуе­кIогъэным фытегъэпсыхьэгъэ Iофтхьабзэхэр шъолъырым зэ­рэщызэхащэрэр къыIуагъ. Ахэр зэрифэшъуашэу гъэцэкIагъэхэ зыхъукIэ, щынэгъончъа­гъэр ухъумагъэ зэрэхъущтыр хи­гъэу­нэфыкIыгъ.

Адыгэ Республикэм и ЛIышъхьэ ипресс-къулыкъу